Хоразм вилоятида 14 млрд сўмга яқин бюджет маблағлари мақсадсиз сарфлангани аниқланди

Коррупцияга қарши курашиш ҳудудий кенгашларининг рейтинг баҳолаш натижаларига кўра, Хоразм вилоятида бюджет маблағларидан ноқонуний фойдаланиш ҳолатлари бўйича март ойида 16 та назорат объектида 13 миллиард 962 миллион сўм маблағлар мақсадсиз сарфлангани аниқланиб, республика миқёсида энг ёмон натижани қайд этган. Бу ҳақда Коррупцияга қарши курашиш агентлиги хабар берди.

Вилоят Коррупцияга қарши курашиш ҳудудий кенгашининг навбатдаги йиғилишида шу каби коррупциявий ҳолатлар Коррупцияга қарши курашиш агентлиги раҳбарияти, Миллий кенгаш аъзолари, мутасадди вазирлик ва идоралар вакиллари ҳамда Ҳудудий кенгаш аъзолари иштирокида атрофлича муҳокама этилган. Хусусан, энергетика тизимида учраётган коррупциявий жиноятлар таҳлили, шунингдек, ушбу тизимда коррупциянинг олдини олиш бўйича амалга оширилган ишлар юзасидан масъулларнинг ахбороти эшитилган.

Қайд этилишича, 2021 йилда республикада энергетика тизимида фаолият юритган 94 нафар шахсга нисбатан оид 63 та коррупцияга оид жиноят иши судларга юборилган. Мазкур жиноятларни содир этганларнинг 91 нафари туман ва шаҳар, 3 нафари эса вилоят даражасидаги мансабдор шахслар бўлиб, улар томонидан давлат ва жамият манфаатларига жами 11,5 миллиард сўм зарар етказилган. Вилоятда бундай жиноятларнинг 3 таси «Хоразм ҳудудий электр тармоқлари» АЖ ходимлари томонидан содир этилган.

Аввалроқ Антикоррупция агентлиги очиқликка оид қонунчилик талабларига риоя этмаган 8 та маҳаллий ҳокимликка огоҳлантириш юборгани тўғрисида хабар берилганди.