1990-yillardagi “Milan” haqli ravishda o‘sha davrning eng yaxshi jamoalaridan biri sanalgan. “Rossonerilar” ikki marta Chempionlar Ligasida g‘olib chiqqan (1990 va 1994-yillarda) va yana ikki bor finalga qadar yetib borgan, biroq 1993-yilda “Marsel”ga, 1995-yilda esa “Ayaks”ga imkoniyatni boy berib qo‘ygan. Bundan tashqari, 1990-yillarda “Milan” besh marta skudettoni qo‘lga kiritgan. Xo‘sh, klubning shonli tarixini yaratgan milanliklar hozir qayerda va nima bilan band? “Milan”ning joriy mavsumdagi chempionligi fonida shonli jamoani eslashning ayni vaqti.
Paolo Maldini, 53 yosh
“Rossonerilar”ning uzoq muddatli sardori Paolo klub safida o‘tkazilgan o‘yinlar soni bo‘yicha rekordchi hisoblanadi — (901). Paolo butun faoliyatini bir klubda o‘tkazgan va 41 yoshida futbol bilan xayrlashgan. Maldini 2018-yildan beri “Milan” tizimida faoliyat olib bormoqda: avvaliga u klubning strategik rivojlanish bo‘yicha direktori edi, hozir esa texnik direktor lavozimini egallab turibdi.
Franko Barezi, 62 yosh
Barezi ham Maldini kabi klub ramzi hisoblanadi. Hatto ularning raqamlari (6 va 3) klub tomonidan abadiylashtirilgan. Aynan Franko o‘yinlar soni bo‘yicha “rossonerilar”ning Maldinidan avvalgi rekordchisi edi (714). Faoliyatining oxirida Barezi murabbiylikni boshladi, “Milan”ning yoshlar jamoalarini boshqardi. Keyinchalik klubning elchisi bo‘lib ishladi, hozirda esa klubning faxriy vitse-prezidenti hisoblanadi.
Alessandro Kostakurta, 56 yosh
“Milan”ning yana bir maydonda uzoq umr o‘tkazgan futbolchilaridan biri Kostakurtadir. U 41 yoshida butsilarini mixga ilgan, 2006/2007- yilgi mavsumda Chempionlar Ligasida qatnashgan eng yoshi katta futbolchiga aylangandi (40 yosh, 6 oy-u, 28 kunlik). Keyinchalik bu rekord boshqa faxriylar tomonidan yangilangani rost, ammo Alessandro uzoq umrli futbolning yorqin namoyondalaridan biri bo‘lib qolaveradi. 2018-yilda Kostakurta Italiya futbol federatsiyasi vitse-komissari lavozimiga saylangan.
Mauro Tassotti, 62 yosh
Tassotti ko‘p yillar davomida “Milan” himoyasining o‘ng qanotini yopib kelgan. Faoliyatini yakunlagan Mauro dastlab “rossonerilar” yoshlar jamoasini boshqardi, 2000/2001-yilgi mavsumda esa asosiy jamoaga ham ustozlik qildi (Alberto Zakkeroni ishdan bo‘shatilgandan keyin). U keyinchalik Maksimiliano Allegri, Karlo Anchelotti va boshqa “Milan” murabbiylariga yordam berdi. 2016—2021-yillarda Ukraina terma jamoasida Andrey Shevchenkoga assistentlik qildi, ayni damda esa “Jenoa” murabbiylar shtabida faoliyat yuritmoqda.
Roberto Donadoni, 58 yosh
Donadoni 1990-yillarda “Milan”ning taniqli figuralaridan biri edi. Ko‘pincha u yarim himoyaning o‘ng qanotida o‘ynardi, shu bilan birga boshqa pozitsiyalarda o‘zini ko‘rsatishdan tortinib o‘tirmasdi. Katta sport bilan xayrlashganidan keyin Roberto murabbiylikni boshladi, A Seriyaning ko‘plab jamoalari va hatto Italiya termasida ham ishladi. Donadoni 2019—2020-yillarda Xitoyning “Shenchjen” klubiga ustozlik qildi.
Sebastyano Rossi, 57 yosh
Deyarli 22 yil davomida Sebastyanoning A Seriyadagi quruq daqiqalar bo‘yicha rekordi saqlanib turdi: 1993/1994-yilgi mavsumda u 11 uchrashuvda (929 daqiqa) o‘z darvozasidan to‘p olib chiqmagan. Faqatgina 2016-yilga kelib bu rekord Janluiji Buffon tomonidan yangilandi — 974 daqiqa. Ishonchli va barqaror o‘yin ko‘rsatganiga qaramay Rossi Italiya terma jamoasi safida birorta uchrashuv o‘tkazmagan. Faoliyatini yakunlagach Sebastyano darvozabonlar murabbiyiga aylandi.
Zvonimir Boban, 53 yosh
Xorvatiyalik yarim himoyachi “Milan”da 9 yil davomida to‘p tepgan. Bu vaqt ichida Zvonimir “qizil-qoralar” bilan ko‘plab unvonlarni qo‘lga kiritdi, jumladan, 1993/1994-yilgi mavsumda Chempionlar Ligasi bosh sovrinini. Yaqin vaqtgacha Boban “Milan”da ishlardi, futbol bo‘limini boshqargan. 2020-yilning mart oyida u “Milan” bosh direktori Ivan Gazidis bilan kelishmovchilik tufayli klubni tark etdi. Ungacha esa FIFA bosh kotibi o‘rinbosari lavozimida faoliyat ko‘rsatgandi.
Frank Raykard, 59 yosh
1995-yilda niderlandiyalik “rossonerilar”ni Chempionlar Ligasidagi g‘alabadan mahrum qilgandi. “Milan”da o‘tkazgan besh mavsumidan so‘ng Raykard o‘zining qadrdon “Ayaks”iga qaytadi. Ajablanarlisi shundaki, ikki klub finalda to‘qnash kelib qoladi va Frank o‘sha o‘yinda Patrik Klyuyvertga golli uzatma beradi — bu gol yakunda Amsterdam klubiga g‘alaba keltiradi. Raykard murabbiylik faoliyatini Niderlandiya terma jamoasida Gus Hiddinkning yordamchisi sifatida boshlaydi. Frankning murabbiylikdagi yorqin onlari “Barselona”da o‘tadi: 2003—2008-yillarda ichki chempionatda ikki marta g‘oliblik qo‘lga kiritiladi, shuningdek, katalonlar uning boshqaruvida Chempionlar Ligasida zafar quchadi. Shundan keyin uning ishida pasayish kuzatiladi va qator omadsizliklardan keyin 2014-yilda murabbiylikdan ketganini e’lon qildi.
Marko van Basten, 57 yosh
Iqtidorli hujumchining faoliyati afsuski, juda erta yakunlangan — 28 yoshda. Bunga tizzadan olingan jarohat sabab bo‘ladi. Marko “Milan”ning ko‘plab sobiq futbolchilari kabi o‘zini murabbiylikda sinab ko‘rdi: dastlab u Niderlandiya terma jamoasida, shuningdek, Erediviziyaning bir qancha klublarida (“Ayaks”, “AZ Alkmaar”, “Herenven”) ishladi. 2016-yildan 2018-yilgacha esa FIFAda texnik direktor sifatida mehnat qildi. Shundan so‘ng Marko Niderlandiya televideniyesida ekspertlik qildi.
Marsel Desayi, 53 yosh
“Milan”da o‘tkazilgan o‘yinlar soni bo‘yicha fransiyalik futbolchi klub tarixidagi birinchi yuztalikka kiradi (186 uchrashuv, 68-o‘rin). Desayi “rossonerilar” o‘yinchisi bo‘lgan besh yil ichida ikkita Skudetto va Chempionlar Ligasini qo‘lga kiritadi. Biroq u ro‘yxatdagilardan farqli ravishda murabbiylik bilan shug‘ullanmadi, Desayi hozirda xayriya ishlari bilan mashg‘ul, bundan tashqari, televideniyeda ekspert va sharhlovchilik qiladi. Marsel 2007-yildan 2011-yilgacha “Milan”ning skauti ham bo‘lgan.
Ruud Gullit, 59 yosh
Gullit, Raykard va van Basten bilan birgalikda “qizil-qoralar” muxlislari haligacha yaxshi xotiralar bilan eslaydigan trioning bir qismi edi. Niderlandiyalik “Milan”da yarim himoya chizig‘ida birdaniga bir qancha pozitsiyalarni yopardi (ba’zida hatto hujumda ham). Ruud butsilarini mixga ilishdan avval murabbiylikni boshlab yuborgandi — u ikki yil davomida “Chelsi”da o‘ynovchi-murabbiy vazifasini bajaradi. Keyinchalik esa 2018-yilgacha Niderlandiya terma jamoasida Dik Advokatning yordamchisi bo‘lib ishladi.
Izoh (0)