1990 йиллардаги «Милан» ҳақли равишда ўша даврнинг энг яхши жамоаларидан бири саналган. «Россонерилар» икки марта Чемпионлар Лигасида ғолиб чиққан (1990 ва 1994 йилларда) ва яна икки бор финалга қадар етиб борган, бироқ 1993 йилда «Марсель»га, 1995 йилда эса «Аякс»га имкониятни бой бериб қўйган. Бундан ташқари, 1990 йилларда «Милан» беш марта скудеттони қўлга киритган. Хўш, клубнинг шонли тарихини яратган миланликлар ҳозир қаерда ва нима билан банд? «Милан»нинг жорий мавсумдаги чемпионлиги фонида шонли жамоани эслашнинг айни вақти.
Паоло Мальдини, 53 ёш
«Россонерилар»нинг узоқ муддатли сардори Паоло клуб сафида ўтказилган ўйинлар сони бўйича рекордчи ҳисобланади — (901). Паоло бутун фаолиятини бир клубда ўтказган ва 41 ёшида футбол билан хайрлашган. Мальдини 2018 йилдан бери «Милан» тизимида фаолият олиб бормоқда: аввалига у клубнинг стратегик ривожланиш бўйича директори эди, ҳозир эса техник директор лавозимини эгаллаб турибди.
Франко Барези, 62 ёш
Барези ҳам Мальдини каби клуб рамзи ҳисобланади. Ҳатто уларнинг рақамлари (6 ва 3) клуб томонидан абадийлаштирилган. Айнан Франко ўйинлар сони бўйича «россонерилар»нинг Мальдинидан аввалги рекордчиси эди (714). Фаолиятининг охирида Барези мураббийликни бошлади, «Милан»нинг ёшлар жамоаларини бошқарди. Кейинчалик клубнинг элчиси бўлиб ишлади, ҳозирда эса клубнинг фахрий вице-президенти ҳисобланади.
Алессандро Костакурта, 56 ёш
«Милан»нинг яна бир майдонда узоқ умр ўтказган футболчиларидан бири Костакуртадир. У 41 ёшида бутсиларини михга илган, 2006/2007- йилги мавсумда Чемпионлар Лигасида қатнашган энг ёши катта футболчига айланганди (40 ёш, 6 ой-у, 28 кунлик). Кейинчалик бу рекорд бошқа фахрийлар томонидан янгилангани рост, аммо Алессандро узоқ умрли футболнинг ёрқин намоёндаларидан бири бўлиб қолаверади. 2018 йилда Костакурта Италия футбол федерацияси вице-комиссари лавозимига сайланган.
Мауро Тассотти, 62 ёш
Тассотти кўп йиллар давомида «Милан» ҳимоясининг ўнг қанотини ёпиб келган. Фаолиятини якунлаган Мауро дастлаб «россонерилар» ёшлар жамоасини бошқарди, 2000/2001 йилги мавсумда эса асосий жамоага ҳам устозлик қилди (Альберто Заккерони ишдан бўшатилгандан кейин). У кейинчалик Максимилиано Аллегри, Карло Анчелотти ва бошқа «Милан» мураббийларига ёрдам берди. 2016—2021 йилларда Украина терма жамоасида Андрей Шевченкога ассистентлик қилди, айни дамда эса «Женоа» мураббийлар штабида фаолият юритмоқда.
Роберто Донадони, 58 ёш
Донадони 1990 йилларда «Милан»нинг таниқли фигураларидан бири эди. Кўпинча у ярим ҳимоянинг ўнг қанотида ўйнарди, шу билан бирга бошқа позицияларда ўзини кўрсатишдан тортиниб ўтирмасди. Катта спорт билан хайрлашганидан кейин Роберто мураббийликни бошлади, А Сериянинг кўплаб жамоалари ва ҳатто Италия термасида ҳам ишлади. Донадони 2019—2020 йилларда Хитойнинг «Шэньчжэнь» клубига устозлик қилди.
Себастьяно Росси, 57 ёш
Деярли 22 йил давомида Себастьянонинг А Сериядаги қуруқ дақиқалар бўйича рекорди сақланиб турди: 1993/1994 йилги мавсумда у 11 учрашувда (929 дақиқа) ўз дарвозасидан тўп олиб чиқмаган. Фақатгина 2016 йилга келиб бу рекорд Жанлуижи Буффон томонидан янгиланди — 974 дақиқа. Ишончли ва барқарор ўйин кўрсатганига қарамай Росси Италия терма жамоаси сафида бирорта учрашув ўтказмаган. Фаолиятини якунлагач Себастьяно дарвозабонлар мураббийига айланди.
Звонимир Бобан, 53 ёш
Хорватиялик ярим ҳимоячи «Милан»да 9 йил давомида тўп тепган. Бу вақт ичида Звонимир «қизил-қоралар» билан кўплаб унвонларни қўлга киритди, жумладан, 1993/1994 йилги мавсумда Чемпионлар Лигаси бош совринини. Яқин вақтгача Бобан «Милан»да ишларди, футбол бўлимини бошқарган. 2020 йилнинг март ойида у «Милан» бош директори Иван Газидис билан келишмовчилик туфайли клубни тарк этди. Унгача эса ФИФА бош котиби ўринбосари лавозимида фаолият кўрсатганди.
Франк Райкард, 59 ёш
1995 йилда нидерландиялик «россонерилар»ни Чемпионлар Лигасидаги ғалабадан маҳрум қилганди. «Милан»да ўтказган беш мавсумидан сўнг Райкард ўзининг қадрдон «Аякс»ига қайтади. Ажабланарлиси шундаки, икки клуб финалда тўқнаш келиб қолади ва Франк ўша ўйинда Патрик Клюйвертга голли узатма беради — бу гол якунда Амстердам клубига ғалаба келтиради. Райкард мураббийлик фаолиятини Нидерландия терма жамоасида Гус Ҳиддинкнинг ёрдамчиси сифатида бошлайди. Франкнинг мураббийликдаги ёрқин онлари «Барселона»да ўтади: 2003—2008 йилларда ички чемпионатда икки марта ғолиблик қўлга киритилади, шунингдек, каталонлар унинг бошқарувида Чемпионлар Лигасида зафар қучади. Шундан кейин унинг ишида пасайиш кузатилади ва қатор омадсизликлардан кейин 2014 йилда мураббийликдан кетганини эълон қилди.
Марко ван Бастен, 57 ёш
Иқтидорли ҳужумчининг фаолияти афсуски, жуда эрта якунланган — 28 ёшда. Бунга тиззадан олинган жароҳат сабаб бўлади. Марко «Милан»нинг кўплаб собиқ футболчилари каби ўзини мураббийликда синаб кўрди: дастлаб у Нидерландия терма жамоасида, шунингдек, Эредивизиянинг бир қанча клубларида («Аякс», «АЗ Алкмаар», «Ҳеренвен») ишлади. 2016 йилдан 2018 йилгача эса ФИФАда техник директор сифатида меҳнат қилди. Шундан сўнг Марко Нидерландия телевидениесида экспертлик қилди.
Марсель Десайи, 53 ёш
«Милан»да ўтказилган ўйинлар сони бўйича франциялик футболчи клуб тарихидаги биринчи юзталикка киради (186 учрашув, 68-ўрин). Десайи «россонерилар» ўйинчиси бўлган беш йил ичида иккита Скудетто ва Чемпионлар Лигасини қўлга киритади. Бироқ у рўйхатдагилардан фарқли равишда мураббийлик билан шуғулланмади, Десайи ҳозирда хайрия ишлари билан машғул, бундан ташқари, телевидениеда эксперт ва шарҳловчилик қилади. Марсель 2007 йилдан 2011 йилгача «Милан»нинг скаути ҳам бўлган.
Рууд Гуллит, 59 ёш
Гуллит, Райкард ва ван Бастен билан биргаликда «қизил-қоралар» мухлислари ҳалигача яхши хотиралар билан эслайдиган трионинг бир қисми эди. Нидерландиялик «Милан»да ярим ҳимоя чизиғида бирданига бир қанча позицияларни ёпарди (баъзида ҳатто ҳужумда ҳам). Рууд бутсиларини михга илишдан аввал мураббийликни бошлаб юборганди — у икки йил давомида «Челси»да ўйновчи-мураббий вазифасини бажаради. Кейинчалик эса 2018 йилгача Нидерландия терма жамоасида Дик Адвокатнинг ёрдамчиси бўлиб ишлади.
Изоҳ (0)