“Borussiya D” yangi bosh murabbiy nomini e’lon qildi

“Borussiya D” Edin Terzich bilan shartnoma imzolaganini e’lon qildi.

Dortmundliklar o‘tgan haftada Marko Rozeni iste’foga chiqargan edi. Uning o‘rnini 39 yoshli Terzich egalladi. Edin “Borussiya D” bilan 2025-yilga qadar mo‘ljallangan shartnomaga imzo chekdi.

Mutaxassis 2018-yilda “Borussiya”da Lyusyen Favrning yordamchisi sifatida faoliyat olib borgan. 2020-yil qishida shveysariyalik murabbiyning iste’fosidan so‘ng bosh murabbiyga aylangandi. Uning qo‘l ostida jamoa Germaniya Kubogida g‘alaba qozongan.

2021/22-yilgi mavsum boshida Terzich “Borussiya D”ning texnik direktori etib tayinlangandi.

“Borussiya D” joriy mavsum 34 o‘yinda 69 ochko jamg‘argan holda Bundesligada ikkinchi o‘rinni qo‘lga kiritdi.

Jamoa Germaniya Kubogida 1/8 finalda “Sankt-Pauli”ga imkoniyatni boy berib, musobaqani tark etgandi. Yevropa Ligasi 1/8 finaliga o‘tish o‘yinida esa “Reynjers”ga mag‘lub bo‘lgandi.