Bugun, 23-may kuni Xalq deputatlari Uchko‘prik tumani kengashining navbatdan tashqari sessiyasi bo‘lib o‘tdi, deb xabar beradi “Daryo” muxbiri Azizjon Ermatov.
Sessiyada tashkiliy masala ko‘rilib, Asqarov Abrorjon Qambarovich Uchko‘prik tumani hokimi lavozimiga tasdiqlangan.
Ma’lum qilinishicha, sessiya ishida viloyat hokimi Xayrulla Bozorov, tuman kengashi deputatlari, hokim o‘rinbosarlari, sektorlar, boshqarma va tashkilot rahbarlari, mahalla raislari, jamoatchilik faollari, OAV vakillari ishtirok etgan.
Sessiyada Xayrulla Bozorov shu kunga qadar Uchko‘prik tumani hokimining birinchi o‘rinbosari — iqtisodiy taraqqiyot va kambag‘allikni qisqartirish bo‘limi boshlig‘i vazifasida ishlab kelgan Abrorjon Asqarov nomzodini tuman hokimi lavozimiga tavsiya qilgan.
Tavsiya etilgan nomzod tuman kengashi deputatlari tomonidan bir ovozdan qo‘llab-quvvatlangan.
Ma’lumot uchun, Abrorjon Asqarov 1984-yil Buvayda tumanida tug‘ilgan bo‘lib, Farg‘ona politexnika institutini tamomlagan. 2004-yildan bank-moliya tizimida mehnat qilib kelgan, 2018—2019-yillarda “Mikrokreditbank” aksiyadorlik-tijorat banki Farg‘ona viloyati filiali boshlig‘i, 2019-yildan Uchko‘prik tumani hokimining iqtisodiyot va tadbirkorlik masalalari bo‘yicha birinchi o‘rinbosari lavozimida faoliyat yuritib kelgan.
Avvalroq Uchko‘prik tumani hokimi vazifasida ishlab kelgan Akmaljon Mahmudaliyev Navoiy viloyati hokimining qishloq va suv xo‘jaligi masalalari bo‘yicha o‘rinbosari lavozimiga tayinlangani haqida xabar berilgan edi.
Izoh (0)