Бугун, 23 май куни Халқ депутатлари Учкўприк тумани кенгашининг навбатдан ташқари сессияси бўлиб ўтди, деб хабар беради «Дарё» мухбири Азизжон Эрматов.
Сессияда ташкилий масала кўрилиб, Асқаров Аброржон Қамбарович Учкўприк тумани ҳокими лавозимига тасдиқланган.
Маълум қилинишича, сессия ишида вилоят ҳокими Хайрулла Бозоров, туман кенгаши депутатлари, ҳоким ўринбосарлари, секторлар, бошқарма ва ташкилот раҳбарлари, маҳалла раислари, жамоатчилик фаоллари, ОАВ вакиллари иштирок этган.
Сессияда Хайрулла Бозоров шу кунга қадар Учкўприк тумани ҳокимининг биринчи ўринбосари — иқтисодий тараққиёт ва камбағалликни қисқартириш бўлими бошлиғи вазифасида ишлаб келган Аброржон Асқаров номзодини туман ҳокими лавозимига тавсия қилган.
Тавсия этилган номзод туман кенгаши депутатлари томонидан бир овоздан қўллаб-қувватланган.
Маълумот учун, Аброржон Асқаров 1984 йил Бувайда туманида туғилган бўлиб, Фарғона политехника институтини тамомлаган. 2004 йилдан банк-молия тизимида меҳнат қилиб келган, 2018—2019 йилларда «Микрокредитбанк» акциядорлик-тижорат банки Фарғона вилояти филиали бошлиғи, 2019 йилдан Учкўприк тумани ҳокимининг иқтисодиёт ва тадбиркорлик масалалари бўйича биринчи ўринбосари лавозимида фаолият юритиб келган.
Аввалроқ Учкўприк тумани ҳокими вазифасида ишлаб келган Акмалжон Маҳмудалиев Навоий вилояти ҳокимининг қишлоқ ва сув хўжалиги масалалари бўйича ўринбосари лавозимига тайинлангани ҳақида хабар берилган эди.
Изоҳ (0)