Toshkentda sintetik giyohvand moddalarni bir manzildan olib, boshqasiga yetkazish bilan shug‘ullangan qiz qo‘lga olindi. Bu haqda poytaxt IIBBga tayanib, UzNews xabar berdi.
Ma’lum qilinishicha, 14-may kuni Yakkasaroy tumani IIBga sintetik giyohvand moddalarni belgilangan manzilga tashlab ketganlikda gumon qilingan qiz olib kelingan. Shaxsiy tintuv chog‘ida qizning futbolkasi ostidan narkotik moddasi belgilangan 36 ta manzil topilgan. Shuningdek, uning sumkasida yana bir belgilangan manzil va 5 ming so‘mlik banknotga o‘ralgan gashish topilgan.
Suhbat chog‘ida qiz bu ish bilan 2021-yilning noyabr oyidan beri shug‘ullanib kelgani aniqlangan. Uning telefonida narkotik moddalar yashirilgan joylar manzilining fotosuratlari topilgan, biroq ko‘rsatilgan manzillar ko‘zdan kechirilganda giyohvand moddalar yo‘qligi ma’lum bo‘lgan.
Qizning so‘zlariga ko‘ra, u giyohvand moddalarni internet-do‘kon orqali olgan. “Ular menga geolokatsiyani yuborishdi. Men u yerga bordim va u yerdan mol olib ketdim. Ular menga qaysi hududda qoldirish kerakligini aytishdi. Shundan so‘ng men ularga manzillar ko‘rsatilgan fotosuratlarni yubordim va ular manzillarni mijozlarga sotishdi. Menga har bir manzil uchun 5 dollardan to‘lashdi”, — deydi qiz. Mazkur fakt bo‘yicha ekspertiza tayinlangan, qizga psixotrop moddalarni saqlash va sotish aybi qo‘yilgan. Hozirda tergov harakatlari olib borilmoqda.
Bundan oldin DXX Toshkentda narkolaboratoriya tashkil qilgan ikki kishini qo‘lga olgani, O‘zbekistonda Tojikistondan keltirgan giyohvand moddalarni sotish bilan shug‘ullangan shaxslar ushlangani, DXX Buxoroda giyohvand moddani 2,5 ming dollarga sotishga uringan Afg‘oniston fuqarosini qo‘lga olgani to‘g‘risida xabar berilgandi.
Mavzuga doir:
Izoh (0)