Varshava Ukrainaning Yevropa Ittifoqiga a’zo bo‘lishini ta’minlash uchun barcha imkoniyatlarni ishga solishga tayyor, dedi Polsha prezidenti Anjey Duda Oliy Radadagi chiqishi chog‘ida. U urush boshlanganidan keyin Ukraina parlamentida so‘zga chiqqan ilk Yevropa yetakchisiga aylandi.
“Ukraina Yevropa Ittifoqiga a’zo bo‘lmaguncha tinchimayman”, — dedi Polsha prezidenti.
Uning qo‘shimcha qilishicha, Ukraina o‘z kelajagini faqat o‘zi belgilashga haqli, u Kiyevni Moskva talablariga bo‘ysunishga chaqirayotgan “bezovta ovozlar”ga ishora qildi. “Agar Ukraina, hatto mamlakat hududining bir santimetri ham iqtisodiy yoki siyosiy ambitsiyalarga qurbon qilinsa, bu nafaqat Ukraina xalqi, balki butun G‘arb olami uchun katta zarba bo‘ladi”, — deya ta’kidladi u.
Varshava va Kiyev o‘rtasidagi do‘stona munosabatlarni qayd etgan Duda yaxshi qo‘shnichilik to‘g‘risidagi yangi Ukraina—Polsha shartnomasini imzolashni taklif qildi. Shuningdek, u Rossiyaning harakatlari tufayli Polshaga kelgan Ukraina fuqarolari mamlakatda qochqin deb hisoblanmasligiga ishontirdi. “Ular bizning mehmonlarimiz”, — deya uning so‘zlarini keltirgan Wirtualna Polska.
Ukraina prezidenti Vladimir Zelenskiy esa o‘z nutqi chog‘ida Polsha Seymiga Ukraina fuqarolariga yordam ko‘rsatish to‘g‘risidagi qonunni qabul qilgani uchun minnatdorlik bildirdi va bu qarorni misli ko‘rilmagan deb atadi, chunki bu ularga Polsha fuqarolari bilan bir xil huquqlar beradi, deb yozadi Oliy Radaning Telegram-kanalida.
“Bu buyuk qadam va buyuk qalbning ishorasi, bunga faqat Ukrainaning buyuk do‘sti qodir. Ushbu qadam biryoqlama qolib ketmaydi”, — dedi u.
Bu orada Fransiya tashqi ishlar vazirligining Yevropa ishlari bo‘yicha vazir delegati Kleman Bon Ukrainaning Yevropa Ittifoqiga qo‘shilish jarayoni 15 yoki 20 yil davom etishi mumkinligi haqida gapirdi.
“Haqiqatni tan olish kerak. Agar Ukraina olti oy, bir yil yoki ikki yil ichida Yevropa Ittifoqiga qo‘shiladi desak, bu to‘g‘ri bo‘lmaydi. Bunga 15 yoki 20 yil kerak bo‘ladi,” — dedi delegat va bu “juda uzoq jarayon” ekanini eslatdi.
Fransiya prezidenti Emmanuel Makron ham 9-may kuni Ukrainaning YIga qo‘shilish jarayoni bir necha yil va hatto o‘nlab yillar davom etishi mumkinligidan ogohlantirgan edi. U Ukrainani ham o‘z ichiga oladigan yangi “Yevropa siyosiy hamjamiyatini” yaratishni taklif qilgan.
19-may kuni Germaniya kansleri Olaf Shols ham Yevropa Ittifoqiga qo‘shilish uchun “qisqa yo‘l” yo‘qligi haqida gapirdi. U Makronning fikriga qo‘shilishini bildirdi.
Ukraina tashqi ishlar vaziri Dmitriy Kuleba, o‘z navbatida, Kiyev to‘laqonli Yevropa Ittifoqi a’zoligiga nomzod davlat maqomini olmoqchi ekanini ta’kidladi.
Avvalroq Yevrokomissiya rahbari Ursula fon der Lyayen YI shartnomalariga o‘zgartirishlar kiritishni va kerak bo‘lsa, asosiy masalalar bo‘yicha 27 a’zo davlatning yagona ovozidan voz kechishni taklif qilgan edi. U, shuningdek, Yevropa Ittifoqi Ukrainaning ittifoqqa qo‘shilish istagini qo‘llab-quvvatlashini bildirdi.
Yevropa Ittifoqining sakkizta davlati — Bolgariya, Chexiya, Estoniya, Latviya, Litva, Polsha, Slovakiya va Sloveniya Ukrainaning ittifoqqa tezroq kirishi g‘oyasini qo‘llab-quvvatlagan.
Izoh (0)