Britaniya Mudofaa vazirligi Rossiyaning “Terminator” jangovar mashinalari Ukrainaga joylashtirilganini ma’lum qildi. Rossiya armiyasida bunday mashinalarning soni 10 tadan oshmaydi

Buyuk Britaniya Mudofaa vazirligi Ukrainadagi vaziyatni har kuni o‘rganib, jangovar hududga Rossiyaning “Terminator” — tanklarni qo‘llab-quvvatlovchi jangovar mashinalari (BMPT)  joylashtirilganini e’lon qildi.

Britaniya harbiylariga ko‘ra, “Terminator” BMPT Donbassdagi hujumni Severodonetskka yo‘naltirgan.

Bunday jihozlar Rossiya Markaziy harbiy okrugining tank polklaridan faqat bittasida xizmat qiladi, deya ta’kidladi Britaniya Mudofaa vazirligi hamda bosqinning boshida Markaziy harbiy okrug qo‘shinlari Kiyevga o‘tishga urinib, katta yo‘qotishlarga duch kelganini qo‘shimcha qildi.

Rossiya armiyasida “Terminator” mashinalari jami 10 donadan oshmaydi, “ular harbiy kampaniyaga sezilarli ta’sir ko‘rsatishi dargumon”, deyiladi Britaniya Mudofaa vazirligida.

“Terminator”ning Ukrainaga joylashtirilgani haqida avvalroq “RIA Novosti” o‘z manbasiga tayanib xabar bergandi. “Tank vzvodlari bilan birgalikda BMPTlar Ukraina pozitsiyalariga, zirhli texnikalari va tankka qarshi raketa tizimlari ekipajlariga o‘t ochishda ishtirok etmoqda”, — degan manba.

“Terminator” BMPT birinchi marta Rossiya armiyasiga 2018-yilda qabul qilingan. Ochiq manbalarda “Terminator”larni ommaviy ishlab chiqarishga qaror qilingani haqida hech qanday ma’lumot yo‘q.

BMPT ikkita 30 millimetrli to‘p, lazerli boshqaruv tizimiga ega to‘rtta “Ataka” tipidagi 9M120-1 boshqariladigan raketa otish moslamasi, ikkita granata otish moslamasi va yangilangan 7,62 millimetrli Kalashnikov tank pulemyotiga ega.

Rossiya armiyasidagi BMPTlarning aniq soni noma’lum, ammo ochiq manbalardan olingan ma’lumotlarga ko‘ra, ularning soni o‘ndan oshmaydi.