Варшава Украинанинг Европа Иттифоқига аъзо бўлишини таъминлаш учун барча имкониятларни ишга солишга тайёр, деди Польша президенти Анжей Дуда Олий Рададаги чиқиши чоғида. У уруш бошланганидан кейин Украина парламентида сўзга чиққан илк Европа етакчисига айланди.
«Украина Европа Иттифоқига аъзо бўлмагунча тинчимайман», — деди Польша президенти.
Унинг қўшимча қилишича, Украина ўз келажагини фақат ўзи белгилашга ҳақли, у Киевни Москва талабларига бўйсунишга чақираётган «безовта овозлар»га ишора қилди. «Агар Украина, ҳатто мамлакат ҳудудининг бир сантиметри ҳам иқтисодий ёки сиёсий амбицияларга қурбон қилинса, бу нафақат Украина халқи, балки бутун Ғарб олами учун катта зарба бўлади», — дея таъкидлади у.
Варшава ва Киев ўртасидаги дўстона муносабатларни қайд этган Дуда яхши қўшничилик тўғрисидаги янги Украина—Польша шартномасини имзолашни таклиф қилди. Шунингдек, у Россиянинг ҳаракатлари туфайли Польшага келган Украина фуқаролари мамлакатда қочқин деб ҳисобланмаслигига ишонтирди. «Улар бизнинг меҳмонларимиз», — дея унинг сўзларини келтирган Wиртуална Полска.
Украина президенти Владимир Зеленский эса ўз нутқи чоғида Польша Сеймига Украина фуқароларига ёрдам кўрсатиш тўғрисидаги қонунни қабул қилгани учун миннатдорлик билдирди ва бу қарорни мисли кўрилмаган деб атади, чунки бу уларга Польша фуқаролари билан бир хил ҳуқуқлар беради, деб ёзади Олий Раданинг Telegram-каналида.
«Бу буюк қадам ва буюк қалбнинг ишораси, бунга фақат Украинанинг буюк дўсти қодир. Ушбу қадам бирёқлама қолиб кетмайди», — деди у.
Бу орада Франция ташқи ишлар вазирлигининг Европа ишлари бўйича вазир делегати Клеман Бон Украинанинг Европа Иттифоқига қўшилиш жараёни 15 ёки 20 йил давом этиши мумкинлиги ҳақида гапирди.
«Ҳақиқатни тан олиш керак. Агар Украина олти ой, бир йил ёки икки йил ичида Европа Иттифоқига қўшилади десак, бу тўғри бўлмайди. Бунга 15 ёки 20 йил керак бўлади,» — деди делегат ва бу «жуда узоқ жараён» эканини эслатди.
Франция президенти Эммануэль Макрон ҳам 9 май куни Украинанинг ЕИга қўшилиш жараёни бир неча йил ва ҳатто ўнлаб йиллар давом этиши мумкинлигидан огоҳлантирган эди. У Украинани ҳам ўз ичига оладиган янги «Европа сиёсий ҳамжамиятини» яратишни таклиф қилган.
19 май куни Германия канцлери Олаф Шольц ҳам Европа Иттифоқига қўшилиш учун «қисқа йўл» йўқлиги ҳақида гапирди. У Макроннинг фикрига қўшилишини билдирди.
Украина ташқи ишлар вазири Дмитрий Кулеба, ўз навбатида, Киев тўлақонли Европа Иттифоқи аъзолигига номзод давлат мақомини олмоқчи эканини таъкидлади.
Аввалроқ Еврокомиссия раҳбари Урсула фон дер Ляен ЕИ шартномаларига ўзгартиришлар киритишни ва керак бўлса, асосий масалалар бўйича 27 аъзо давлатнинг ягона овозидан воз кечишни таклиф қилган эди. У, шунингдек, Европа Иттифоқи Украинанинг иттифоққа қўшилиш истагини қўллаб-қувватлашини билдирди.
Европа Иттифоқининг саккизта давлати — Болгария, Чехия, Эстония, Латвия, Литва, Польша, Словакия ва Словения Украинанинг иттифоққа тезроқ кириши ғоясини қўллаб-қувватлаган.
Изоҳ (0)