Avstraliyada o‘tkazilgan parlament saylovlarida liberallar mag‘lubiyatga uchradi

Avstraliya liberallar partiyasi rahbarligidagi koalitsiya mamlakatda bo‘lib o‘tgan saylovlarda mag‘lubiyatga uchradi. Bu haqda The Guardian xabar bergan.

“Avstraliyaning amaldagi bosh vaziri Skott Morrison parlament saylovlaridagi mag‘lubiyatini tan oldi va partiya rahbarligidan ketishini e’lon qildi”, — deb yozmoqda gazeta.

Nashr bergan ma’lumotga ko‘ra, saylov uchastkalari yopilishiga bir necha soat vaqt qolganida bir qator tahlilchilar liberallar boshqaruvidagi koalitsiyaning Milliy partiya ko‘magida ham parlamentdagi 76 o‘rindan iborat minimum natijaga erisha olmasligini taxmin qilgandi.

Endi leyboristlar partiyasi yetakchisi Entoni Elbaniz saylovlarda g‘alaba qozongani uchun keyingi Vazirlar Mahkamasi tarkibini shakllantirishga urinib ko‘radi. Biroq Elbaniz ham hukumat tuzish uchun to‘liq g‘alaba qozonib ulgurmagan va yakuniy natijalardan keyin koalitsiya tuzish yuzasidan muzokaralar olib borishi mumkin.