NATO rahbari Yens Stoltenberg Turkiya prezidenti Rajab Toyyib Erdo‘g‘on bilan Shvetsiya hamda Finlyandiyaning alyansga kirishi borasida muzokaralar o‘tkazdi. Bu haqda tashkilot rahbari Twitter’da tvit qoldirgan.
Suhbat davomida NATO uchun “ochiq eshiklar” prinsipining muhimligini qayd etgan. Shuningdek, Turkiya prezidenti mazkur siyosatni qo‘llab-quvvatlashini bildirgan.
“Biz barcha ittifoqchilarning xavfsizlik borasidagi manfaatlarini ta’minlash zarurligi va muammolar yechimiga erishish uchun muzokara olib borishda davom etilishi kerak, degan fikrga qo‘shilamiz”, — deya ta’kidlagan Stoltenberg.
Finlyandiya parlamenti spikeri Matti Vanxanen YLE nashriga bergan intervyusida mamlakatning NATOga qo‘shilish niyati jiddiyligini aytgan. Shuningdek, u Xelsinkining Anqara tufayli o‘z huquqiy me’yorlarini o‘zgartirmoqchi emasligini qayd etgan.
“Turkiya siyosiy jihatdan mazkur masalada kelishib olishning imkonsizligini tushunishi lozim. Aybsiz odamlarni boshqa davlatlarga topshirishmaydi, ayniqsa, ular qamoqqa tashlansa yoki asossiz sud qilinsa, bunday qilinmaydi”, — degan Vanxanen.
Avval 21-mayda Erdo‘g‘on Shvetsiya bosh vaziri Magdalena Andersson hamda Finlyandiya prezidenti Sauli Niinestyo bilan telefon orqali suhbatlashgan, Anqara terrorchilik tashkiloti deb hisoblovchi Kurdiston ishchi partiyasi vakillarini qo‘llab-quvvatlash noto‘g‘ri ekanligini ularga ma’lum qilgandi. U Shvetsiyani mazkur guruhlarga moliyaviy va harbiy yordam ko‘rsatishni to‘xtatishga chaqirgan.
May o‘rtalarida Stokgolm va Xelsinki NATOga kirish uchun so‘rov topshirgani haqida xabarlar tarqaldi. Ammo Turkiya prezidenti Anqaraning mazkur tashabbuslarni qo‘llab-quvvatlamasligi, chunki ikki davlat terrorchilarni topshirmagan va turklarga qarshi sanksiyalar kiritganini ta’kidlagan.
Turkiyaning Sabah nashri mamlakatning Shvetsiya va Finlyandiyaga NATOga qabul qilinishi haqidagi shartlari aks etgan manifest taklif qilganini yozgan. Anqara ikki davlatdan Kurdiston ishchi partiyasi yetakchilari bilan muloqot qilmaslik, ularni parlament a’zoligiga olmaslik va tezroq Turkiyaga ekstraditsiya qilishni so‘ragan.
AQSH prezidentining milliy xavfsizlik masalalari bo‘yicha maslahatchisi Jeyk Sallivan 19-mayda Turkiyaning mazkur masaladagi shubhalariga barham berilishi va NATOga a’zo mamlakatlar a’zolikka qabul qilinish borasidagi so‘rovni bir ovozdan ma’qullashiga ishonch bildirgan.
Izoh (0)