НАТО раҳбари Йенс Столтенберг Туркия президенти Ражаб Тоййиб Эрдўғон билан Швеция ҳамда Финляндиянинг альянсга кириши борасида музокаралар ўтказди. Бу ҳақда ташкилот раҳбари Twitter’да твит қолдирган.
Суҳбат давомида НАТО учун «очиқ эшиклар» принципининг муҳимлигини қайд этган. Шунингдек, Туркия президенти мазкур сиёсатни қўллаб-қувватлашини билдирган.
«Биз барча иттифоқчиларнинг хавфсизлик борасидаги манфаатларини таъминлаш зарурлиги ва муаммолар ечимига эришиш учун музокара олиб боришда давом этилиши керак, деган фикрга қўшиламиз», — дея таъкидлаган Столтенберг.
Финляндия парламенти спикери Матти Ванханен YLE нашрига берган интервьюсида мамлакатнинг НАТОга қўшилиш нияти жиддийлигини айтган. Шунингдек, у Хелсинкининг Анқара туфайли ўз ҳуқуқий меъёрларини ўзгартирмоқчи эмаслигини қайд этган.
«Туркия сиёсий жиҳатдан мазкур масалада келишиб олишнинг имконсизлигини тушуниши лозим. Айбсиз одамларни бошқа давлатларга топширишмайди, айниқса, улар қамоққа ташланса ёки асоссиз суд қилинса, бундай қилинмайди», — деган Ванханен.
Аввал 21 майда Эрдўғон Швеция бош вазири Магдалена Андерссон ҳамда Финляндия президенти Саули Ниинестё билан телефон орқали суҳбатлашган, Анқара террорчилик ташкилоти деб ҳисобловчи Курдистон ишчи партияси вакилларини қўллаб-қувватлаш нотўғри эканлигини уларга маълум қилганди. У Швецияни мазкур гуруҳларга молиявий ва ҳарбий ёрдам кўрсатишни тўхтатишга чақирган.
Май ўрталарида Стокгольм ва Хелсинки НАТОга кириш учун сўров топширгани ҳақида хабарлар тарқалди. Аммо Туркия президенти Анқаранинг мазкур ташаббусларни қўллаб-қувватламаслиги, чунки икки давлат террорчиларни топширмаган ва туркларга қарши санкциялар киритганини таъкидлаган.
Туркиянинг Sabah нашри мамлакатнинг Швеция ва Финляндияга НАТОга қабул қилиниши ҳақидаги шартлари акс этган манифест таклиф қилганини ёзган. Анқара икки давлатдан Курдистон ишчи партияси етакчилари билан мулоқот қилмаслик, уларни парламент аъзолигига олмаслик ва тезроқ Туркияга экстрадиция қилишни сўраган.
АҚШ президентининг миллий хавфсизлик масалалари бўйича маслаҳатчиси Жейк Салливан 19 майда Туркиянинг мазкур масаладаги шубҳаларига барҳам берилиши ва НАТОга аъзо мамлакатлар аъзоликка қабул қилиниш борасидаги сўровни бир овоздан маъқуллашига ишонч билдирган.
Изоҳ (0)