19-may kuni soat 16:30 larda Paxtakor tumani hududidan o‘tgan Jizzax—Paxtakor—Do‘stlik—Gagarin—4R-35 avtomobil yo‘lida sodir bo‘lgan yo‘l-transport hodisasi oqibatida bir nafar yo‘lovchi halok bo‘ldi. Bu haqda Jizzax viloyati IIB axborot xizmati xabar berdi.
Ma’lum qilinishicha, 41 yoshli haydovchi boshqaruvida bo‘lgan Nexia-3 Jizzax—Gagarin yo‘nalishi bo‘ylab harakatlanayotganida shu yo‘nalishda o‘zidan oldinda harakatlanib ketayotgan “ZIL-130” yuk avtomashinasiga urilishi natijasida YTH sodir etgan.
Avariya oqibatida Nexia-3 salonida bo‘lgan yo‘lovchi turli tan jarohatlari olgan, ko‘rsatilgan muolajalarga qaramay shifoxonada vafot etgan.
Ta’kidlanishicha, yo‘l-transport hodisasi yuk avtomobili chapga manyovrni amalga oshirayotgan vaqtda orqa tomondan harakatlanib kelayotgan Nexia-3 uning orta kuzov qismiga kelib urilgan.
“Nexia avtomobilining tormoz izi salkam 45 metrni tashkil etmoqda, bu esa transport vositasining tezligi o‘ta yuqori bo‘lganidan dalolat beradi”, — deydi viloyat IIB JXX YHXB katta inspektori Erkin Ochilov.
Avvalroq Namanganda Gentra va o‘quv mashinasi ishtirokida sodir bo‘lgan YTH oqibatida bir haydovchi halok bo‘lgani, Namanganda 6 yashar bolani Gentra urib ketgani, Toshkentda Matiz bilan to‘qnashgan Epica ag‘darilib ketgani xabar qilingan.
Izoh (0)