Toshkent aeroportida Nyu-Yorkdan o‘zi bilan tarkibida kannabis moyi bo‘lgan shokolad, marmelad va saqichlar olib kelgan fuqaro to‘xtatib qolindi. Bu haqda Davlat bojxona qo‘mitasi matbuot xizmati xabar berdi.
Ma’lum qilinishicha, 13-may kuni Nyu-York—Toshkent reysi bo‘yicha kelgan yo‘lovchining yuklari belgilangan tartibda nazorat rentgen uskunasi orqali ko‘zdan kechirilgan. Bojxona tekshiruvi natijasida jami 18 ta qadoqda jelatin ko‘rinishdagi saqich, 2 quti konfet va bitta qadoqdagi 10 dona shokolad tarkibida kannabis moyi giyohvandlik moddasi borligi aniqlangan.
Bundan tashqari, bojxona ko‘rigi davomida ushbu shaxsning qo‘l yuki va bagajlari orasida ichiga suyuqlik shaklida giyohvandlik modda joylashtirilgan va uning iste’moli uchun xizmat qiluvchi 6 turdagi 14 dona turli qurilma va vositalar, ichiga solingan narkotik vositasini maydalab kukun holatiga keltiruvchi bir dona qurilma hamda narkotik moddasini chekishda foydalaniladigan 4 dona maxsus qog‘oz o‘ram borligi aniqlangan.
Yo‘lovchining ko‘zoynagi g‘ilofiga yashirilgan 1,2 gramm marixuana giyohvandlik vositasi ham fosh etilgan.
Yuk egasi ushbu giyohvandlik moddasini davolanish uchun o‘zi iste’mol qilishini va amaldagi tartiblarni bilmasligini ma’lum qilgan. Hozirda mazkur holat yuzasidan bojxona organlari tomonidan tergovga qadar tekshiruv harakatlari olib borilmoqda.
Avvalroq O‘zbekistonda Tojikistondan keltirgan giyohvand moddalarni sotish bilan shug‘ullangan shaxslar qo‘lga olingani, Surxondaryoda xizmat iti vagon g‘ildiragiga yashirilgan 1,7 kilogramm giyohvand moddalarni aniqlagani, Toshkentda 3 kg geroin va 7,5 kg opiyni Afg‘onistondan laganlar orasiga yashirib olib o‘tgan shaxslar ushlangani to‘g‘risida xabar berilgandi.
Izoh (0)