AQSH prezidenti Jo Bayden mamlakatning O‘zbekistondagi navbatdagi elchisi sifatida uzoq yillik tajribaga ega diplomat Jonatan Henik nomzodini ko‘rsatdi. Bu haqda “Amerika ovozi” nashri xabar berdi.
Nomzod Kongressning yuqori palatasi, Senat tasdig‘idan o‘tishi kerak. Amerikaning Toshkentdagi hozirgi elchisi Daniyel Rozenblum faoliyatini boshlaganiga uch yildan oshdi. Henik to‘liq tasdiqlanguncha Rozenblum vazifasida davom etadi.
Nyu-Yorkda ulg‘aygan Henik yaqingacha AQSH Davlat departamentida Markaziy Osiyo bo‘yicha bosh diplomat edi. U, shuningdek, xalq diplomatiyasi yo‘nalishda uzoq yillar xizmat qilgan.
Ayni damda Henik AQSH Mudofaa universitetining Kiberxavfsizlik va axborot kollejida Davlat departamentining mas’uli lavozimida faoliyat yuritmoqda. Diplomat dezinformatsiyaga qarshi kurash bo‘yicha kuchli mutaxassis sanaladi.
Eslatib o‘tamiz, 2019-yilning aprelida AQSH Senati Daniel Rozenblyumni mamlakatning O‘zbekistondagi favqulodda va muxtor elchisi sifatida tasdiqlagandi. Bunga qadar u AQSh davlat kotibining Janubiy va Markaziy Osiyo ishlari bo‘yicha yordamchisi o‘rinbosari lavozimida faoliyat yuritgan.
Izoh (0)