Ijtimoiy tarmoqlarda Andijon viloyati Xo‘jaobod tumani yangi mashina bozor oldidagi ko‘p qavatli uyning ustidan ikki yosh o‘zini tashlamoqchi bo‘lgani aytilgan video tarqaldi. Viloyati IIB holatga munosabat bildirdi.
Ma’lum qilinishicha, 20-may kuni 17:20 larda Xo‘jaobod tumani “Mustaqillikning 30 yilligi” MFY hududida joylashgan ko‘p qavatli uyda yashovchi X. ismli fuqaro M. ismli qiz bilan birga atrofni tomosha qilish maqsadida ko‘p qavatli uyning tom qismida o‘tirgan. Shu paytda hududda yashovchi fuqarolar go‘yoki ular tomdan o‘zlarini tashlamoqchi deya videoga olgan.
Ushbu holat yuzasidan Andijon viloyati IIVning 102 ishonch raqamiga murojaat kelib tushgan va mazkur holat yuzasidan Xo‘jaobod tumani IIB mas’ul xodimlari voqea joyiga borib, holat bo‘yicha surishtiruv ishlari olib borgan.
Fuqarolar X. va M. tushuntirish xatida u yerga ikkisi ham atrofni tomosha qilish maqsadida chiqqani va o‘zaro gaplashib o‘tirishganini, ko‘p qavatli uyning tom qismidan sakrash niyati bo‘lmaganini bildirgan. Holat yuzasidan fuqarolar bilan yakka tartibda suhbat o‘tkazilib, profilaktik ishlar amalga oshirilgan. Kelgusida bu kabi holatlarga yo‘l qo‘ymasliklari haqida ogohlantirilgan.
Avvalroq Andijonda 2022-yilning dastlabki uch oyida 10 nafar maktab o‘quvchisi o‘z joniga qasd qilgani, Nukusda 21 yoshli qiz kanalga sakrab o‘z joniga nima sababdan qasd qilmoqchi bo‘lgani aniqlangani to‘g‘risida xabar berilgandi.
Izoh (0)