“Aholiga narkologik yordam ko‘rsatish tizimini yanada takomillashtirish bo‘yicha qo‘shimcha chora-tadbirlar to‘g‘risida”gi prezident qarori qabul qilindi. Sog‘liqni saqlash vazirligi qaror bilan tasdiqlangan bir qator o‘zgarishlar haqida ma’lumot berdi.
Qayd etilishicha, 2022—2026-yillarda O‘zbekiston Respublikasi narkologiya xizmatini yanada rivojlantirish chora-tadbirlari dasturi, 2022—2023-yillarda narkologiya muassasalarini tibbiyot uskunalari bilan jihozlashning (qo‘shimcha jihozlashning) asosiy parametrlari, 2022-yil yakuniga qadar narkologik bemorlarni ixtiyoriy va majburiy davolash uchun narkologiya dispanserlarida qo‘shimcha tashkil etiladigan o‘rinlar fondi tasdiqlangan.
SSV va IIVning narkologik kasallikka chalingan shaxslarni majburiy ravishda davolash tartibini takomillashtirish yuzasidan quyidagi takliflariga rozilik berilgan:
- ichki ishlar organlariga o‘z tashabbusiga ko‘ra, narkologik kasallikka chalingan shaxslarni majburiy davolashga yuborish yuzasidan hujjatlarni tayyorlash va rasmiylashtirish huquqini berish;
- 2023-yil 1-yanvardan boshlab narkologik kasalliklarga chalingan shaxslarni majburiy davolashga yuborish bo‘yicha barcha tibbiy tekshiruvlarni narkologiya dispanserlarining o‘zida, zarur hollarda boshqa muassasalarda amalga oshirish;
- narkologiya dispanserlaridagi mavjud koykalar haqidagi ma’lumotlarni real vaqt rejimida olish imkoniyatini yaratish.
Huquqni muhofaza qiluvchi organlar tomonidan narkologiya dispanserlari yoki tuman (shahar) davolash-profilaktika muassasalariga olib kelingan probatsiya nazoratidagi shaxslarni alkogolli ichimliklar, giyohvandlik vositalari ta’sirida yoki o‘zgacha tarzda mast holatda ekanligini aniqlash bo‘yicha tibbiy tekshiruvdan o‘tkazish tartibi joriy etiladi.
Avvalroq O‘zbekistonda tibbiyot xodimlariga 100 foizgacha maxsus oylik ustamalar to‘lanishi, 1-iyundan tibbiyot xodimlarining oylik maoshlari oshirilishi, har yili 1 mln nafargacha aholi virusli gepatitning B va C turlariga skrining tekshiruvlardan o‘tkazilishi xabar qilingandi.
Mavzuga doir:
Izoh (0)