“Ayrim dolzarb virusli infeksiyalar tarqalishiga qarshi kurashish chora-tadbirlarini takomillashtirish to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar qildi.
Qarorga muvofiq, 2022-yil 1-iyuldan har yili respublika aholisini virusli gepatit B va C turlariga skrining tekshiruvlari soni 1 million nafargacha yetkaziladi. Polimeraza zanjir reaksiyasi (PZR) tekshiruvlari soni 15 ming nafargacha, virusli gepatit C turi bilan kasallangan bemorlarni davolash 10,5 ming nafargacha oshiriladi.
2022-yil 1-sentabrdan Ma’muriy javobgarlik to‘g‘risidagi kodeksning 190-moddasida (fohishalik bilan shug‘ullanish) nazarda tutilgan huquqbuzarliklarni sodir etgan shaxslarga nisbatan javobgarlikni belgilash bilan birga ularni o‘z hisobidan gepatitning B va C turlariga skrining tekshiruvlaridan o‘tkazish tartibi joriy etiladi.
2022-yil 1-noyabrgacha jigar surunkali virusli kasalliklarining yagona elektron reyestri ishlab chiqiladi. 2022-yil 1-iyuldan nodavlat tibbiyot tashkilotlari qon va uning tarkibiy qismlari bilan ishlayotgan xodimlar gepatit B infeksiyasiga qarshi emlanadi. 2024-yil 1-yanvardan nodavlat tibbiyot tashkilotlarida qon va uning tarkibiy qismlari bilan ishlayotgan xodimlarning gepatit B infeksiyasiga qarshi emlangan bo‘lishi hamda reyestrning yuritilishi tibbiy faoliyatni litsenziyalash talablari va shartlaridan biri hisoblanadi.
2022-yil 1-iyuldan har yili keng tarqalgan virusli infeksiyalar muammolarining ilmiy yechimini ta’minlashga qaratilgan loyihalarga tanlovlar asosida mablag‘lar ajratiladi. 2022—2023-yillarda epidemiologik ko‘rsatmaga muvofiq, davlat sog‘liqni saqlash tizimidagi 119 016 nafar xodimning (shundan 2022 yilda 47 605 nafari) gepatit B infeksiyasiga qarshi emlanishi nazarda tutilgan.
Avvalroq qaror bilan O‘zbekistonning 7 ta hududida Qrim-Kongo isitmasi bilan kasallanganlarning qon plazmasi banki tashkil etilishi, har yili 1 mln nafargacha aholi virusli gepatitning B va C turlariga skrining tekshiruvlardan o‘tkazilishi haqida xabar berilgandi.
Izoh (0)