Olmaota—Toshkent—Olmaota yo‘nalishida “Tulpor Talgo” poyezdining qatnovi qayta tiklandi, deb xabar bermoqda Transport vazirligi.
Qayd etilishicha, “Qazaqstan temir joli” bilan kelishilgan holda temir yo‘llarda yo‘lovchi tashish qayta yo‘lga qo‘yilgan. 16-maydan boshlab Olmaota-2—Toshkent—Olmaota-2 yo‘nalishida 1/2-sonli “Tulpor-Talgo” poyezdining qatnovi qayta tiklangan. 2 yarim yillik tanaffusdan so‘ng ilk bor O‘zbekistonga qarab yo‘l olgan ushbu poyezd 17-may soat 11:05 da Toshkent Markaziy temiryo‘l vokzaliga kirib kelgan.
Tarkibi 24 ta yo‘lovchi vagondan iborat bo‘lgan poyezd bir tomonga harakatlanganda 425 nafar yo‘lovchini o‘z manziliga yetkazib qo‘yish imkoniyatga ega hisoblanadi.
Harakat jadvaliga ko‘ra, ushbu poyezd haftaning dushanba, chorshanba va shanba kunlari Olmaota-2 temir yo‘l vokzalidan soat 18:32 da yo‘lga chiqadi. Ertasi kuni soat 12:39 da Toshkent markaziy temir yo‘l vokzalidan harakatini amalga oshiradi.
O‘zbekiston—Qozog‘iston temiryo‘l qatnovlarining tiklanish jarayoni
O‘zbekistonda ilk bor koronavirus aniqlangan 2020-yil 16-martdan boshlab temiryo‘l transporti qatnovlari to‘xtatilgan edi. 2020-yilning 15-avgustidan mahalliy avia va temiryo‘l qatnovlari bosqichma-bosqich tiklangan. Ikki yillik cheklovlardan so‘ng, qator davlatlar tomonidan poyezd yo‘lovchilari uchun davlat chegaralarini bosqichma-bosqich ochish borasida sa’y-harakatlar boshlangan. Birinchi xalqaro yo‘lovchi poyezdi 1-aprel kunidan boshlab Nukus—Beyneu—Nukus yo‘nalishi bo‘yicha qatnay boshlashi xabar qilingandi. Shuningdek, 2-maydan boshlab haftada uch marotaba Olmaota-2—Toshkent—Olmaota-2 yo‘nalishida 1/2-sonli poyezd qatnovi yo‘lga qo‘yilishi ham rejalashtirilgandi. Mart oyi so‘nggida Qozog‘istonda karantin cheklovlari joriy etilgani sabab Nukus—Beyneu va Toshkent—Olmaota yo‘nalishidagi xalqaro yo‘lovchi poyezdlari qatnovini boshlash sanasi noma’lum muddatga ko‘chirilgandi. 15-may kunidan esa 647/648-sonli Nukus—Beyneu—Nukus yo‘nalishidagi yo‘lovchi poyezdining qatnovi bilan O‘zbekiston va Qozog‘iston o‘rtasidagi poyezdlar qatnovi qayta tiklandi.
Izoh (0)