Uzbekistan Airways kompaniyasi Toshkentdan Buxoroga “Ilk parvozim” ijtimoiy loyihasini amalga oshirdi. Parvoz yo‘lovchilari esa “temir daftar”ga kiritilgan 15 nafar ayol bo‘ldi, deya xabar bermoqda “Daryo” muxbiri.
Kompaniya axborot xizmati rahbari Kamola Ikromovaning “Daryo”ga ma’lum qilishicha, kompaniya bir necha oy ilgari “Ilk parvozim” ijtimoiy loyihasini yo‘lga qo‘ygan bo‘lib, 2022-yilning 17-may kuni loyiha asosida 15 nafar xotin-qizni Buxoroga sayohatga olib borgan.
“Inson hayot sinovlaridan charchab, orzularining ushalishiga ishonmay qolganida kutilmaganda mo‘jiza yuz berishini xayoliga ham keltirmaydi. Vaholanki, hayot insonga kutilmagan tuhfalarni hadya etishi mumkin. Loyiha amalga oshirilguncha juda ko‘p sonli ijtimoiy himoyaga muhtoj va kam ta’minlangan oila bekalari bilan suhbatda bo‘ldik. Ularning orzulari, o‘y-xayollari bilan qiziqdik. Ishonasizmi, ko‘pchiligida bir xil orzu — samolyotda parvoz qilish ishtiyoqi bor ekan. Bu kimlargadir erish tuyular, ammo ularning orzularini amalga oshirishni kompaniyamiz rahbariyati ham qo‘llab-quvvatladi. Onaxon, opaxonlarning ko‘zlaridagi quvonch-u, shodlikka hech narsa teng bo‘lolmas ekan. Ularga bir kun bo‘lsa-da, shunday quvonch bag‘ishlay olganimizdan o‘zimiz ham xursandmiz”, —deydi Kamola Ikromova.
“Daryo” muxbiri sayohatchi ayollar bilan suhbatda bo‘ldi.
“Ikki nafar farzandim bor. Ularni ulg‘aytirish, voyaga yetkazish, hayotga tayyorlash bilan umr o‘tdi. Ammo biror marotaba sayohatga chiqmagan ekanman. Bilasiz, sayohatga chiqish uchun ham iqtisodiy sharoit kerak, istaymizmi-yo‘qmi, hamma narsa pulga borib taqaladi. Sharoitsizlik sabab umrning yarimini yashab bo‘ldim. Ishonasizmi, men umrim davomida hatto poyezdga ham chiqmaganman. Samolyotda uchish orzusi esa allaqachon bolalikdagi xomxayollarga aylanib bo‘lgandi. Odam osmonga chiqsa, yerdagilar chumolidek bo‘lib ko‘rinsa kerak-a, deya dugonalar bir-birimizga bergan savollarimiz haligacha xayollarimizda yashab kelgan. Bir kuni qo‘ng‘iroq bo‘ldi va samolyotga uchishni istaysizmi, deya savol berishdi. Hayajondan o‘zimni boladek his qilib, samolyotga uchishni orzu qilmagan bola bormi, debman. Avvaliga kimdir hazillashyaptimikan, deb o‘yladim. Yo‘q, Uzbekistan Airways kompaniyasiga rahmat. Oradan qirq yillardan ko‘proq vaqt o‘tib, bolalikdagi orzularimizga oshno etdi. Judayam xursandmiz”, — deydi tashkilotchilarga o‘z minnatdorligini bildirgan Rashanoy Baymakova.
O‘n yil ilgari turmushga chiqqan Halima Umarova ham uy va oila tashvishlari bilan bo‘lib, biror marotaba sayohatga chiqmaganini bugun esa e’tibordan mamnun ekanini bildirdi.
Sayohatchi ayollar Buxoro shahrining qadim obidalari, ulug‘ qadamjolari hamda ziyoratgohlarida bo‘ldi.
“O‘ylamagan va xayolimizga kelmagan ishlar bo‘ldi-da. Orzular qanotida parvoz qildik. Ko‘z ochib yumguncha qadim shaharga sayohatga keldik. Buxoroni suratlarda ko‘rganman, televizorda tomosha qilganman. O‘zimni xuddi ertaklar olamida yurgandek his qilyapman. Eshitishimcha, Buxoroi sharifning qaysi manzilida turib bo‘lsa ham niyat qilsang, amalga osharkan. Shu muqaddas zaminda turib, Umra ziyoratiga ham borishlik nasib etishini niyat qildim”, — deydi 67 yoshli onaxon quvonch yoshlarini yashirolmay.
Bildirilishicha, Uzbekistan Airways kompaniyasining “Ilk parvozim” ijtimoiy loyihasi bundan ilgari Xorazm viloyatiga ikki kunlik sayohat bilan boshlangan bo‘lib, bu sayohatda ham ayollarning yo‘l, yashash va ovqatlanish xarajatlari kompaniya tomonidan to‘liq qoplab berilgan.
“Ilk parvozim” ijtimoiy loyihasi ayollar orzularini ro‘yobga chiqarishda davom etadi. Loyihadan ko‘zlangan maqsad bitta, u ham bo‘lsa, kemtik ko‘ngilli onaxon, opaxonlarimizga bir lahza bo‘lsa-da hayotdan bahramandlik va xursandchilik ulasha olish. O‘zlari aytishganidek, bolalikdagi samolyotda parvoz qilishdek beg‘ubor orzularini amalga oshirish”, — deydi Kamola Ikromova.
Izoh (0)