Toshkent shahar Ichki ishlar bosh boshqarmasi boshlig‘i, poytaxt prokurori va Milliy gvardiya poytaxt boshqarmasi boshlig‘i ishtirokida 2022-yilning ilk 4 oyi yakunlari bo‘yicha hisobot yig‘ilishi bo‘lib o‘tdi. Bu haqda Toshkent shahar IIBB axborot multimedia markazi xabar berdi.
Yig‘ilish avvalida poytaxt ichki ishlar organlari tomonidan amalga oshirilgan ishlar sarhisob qilingan. Jumladan, bevosita xodimlarning tashabbusi bilan 2 435 ta jinoyat, ulardan 769 tasi giyohvandlik va psixotrop vositalarining noqonuniy savdosi bilan bog‘liq jinoyatlar aniqlangan bo‘lib, unda 217 kilogrammdan ortiq giyohvandlik va 24 kilogrammdan ziyod kuchli ta’sir qiluvchi dori vositalarining tarqalib ketishining oldi olingan. Shuningdek, 7 777 ta jinoyat fosh etilgan, ulardan 221 tasi o‘tgan yillarda sodir etilgan jinoyatlar, 537 nafar qidiruvdagi shaxslar ushlanib, jazo muqarrarligi ta’minlangan.
Shundan so‘ng, tuman IIO FMB boshliqlari, tuman prokurorlari, Milliy gvardiya mas’ul rahbarlarining o‘tgan vaqt mobaynida poytaxt hududida jinoyatchilikning barvaqt oldini olish borasida amalga oshirgan ishlari va yo‘l qo‘yilgan kamchiliklar bo‘yicha hisobotlari tinglangan.
Shu bilan birga, Toshkent shahar hududida jinoyat salmog‘i yuqori deb topilgan 169 ta mahallaga mas’ul rahbarlar biriktirilib, ularga aniq vazifa va topshiriqlar berilgan. Shu yerning o‘zida shahar prokurori, IIBB hamda Milliy gvardiya Toshkent shahar boshqarmasi boshliqlarining “Xavfsiz poytaxt” profilaktik oyligini o‘tkazish bo‘yicha qo‘shma qarori tasdiqlanib, ijroga qaratilgan.
Yig‘ilish yakunida huquqni muhofaza qilish organlari ayrim rahbarlarining faoliyati qattiq tanqid qilinib, 2-chorak yakuni bo‘yicha ko‘rsatkichlar ijobiy tomonga o‘zgarmagan taqdirda, egallab turgan lavozimlaridan ozod etilishlari to‘g‘risida ogohlantirilgan.
Avvalroq O‘zbekistonda 2021-yilda 18–30 yoshdagi ayollar tomonidan sodir etilgan jinoyatlar soni 2 baravar ko‘paygani to‘g‘risida xabar berilgandi.
Izoh (0)