AOKAda Monopoliyaga qarshi kurashish qo‘mitasi va uning hududiy bo‘limlari tomonidan 2022-yilning dastlabki choragida amalga oshirilgan ishlarga bag‘ishlangan matbuot anjumani bo‘lib o‘tdi.
Matbuot anjumanida jurnalist qo‘mita raisi Shohrux Shorahmetovga davlat rahbari 2022-yil boshida “O‘zavtosanoat”ga avtomobil xaridida yuzaga kelayotgan navbatlarni 1-may sanasiga qadar bartaraf etish borasidagi vazifa qo‘ygani va qo‘mita bu borada amalga oshirilayotgan ishlarni kuzatib boryaptimi, degan savolni bergan.
“Bu vaziyat bo‘yicha dastlab UzAutoMotors rahbariyatidan so‘rasangiz, maqsadga muvofiq bo‘lar edi. Ularni himoya qilish niyatimiz yo‘q. Jahon bozorida bo‘layotgan holatlarni kuzatishingizni tavsiya qilaman. Nomlarini aytmasam ham, yirik-yirik kompaniyalar avtomobil ishlab chiqarishni to‘xtatyapti. Chunki yarimo‘tkazgichlar masalasi turibdi. Aytmoqchi bo‘lganim, bu faqat O‘zbekistondagi vaziyat emas. Yana bir bor qaytaraman, nima sababdan bunday bo‘layotganini UzAutoMotors rahbariyatidan so‘rasangiz, ular sizga batafsilroq tushuntirib beradi”, — deya javob qaytargan Shorahmetov.
Eslatib o‘tamiz, fevral oxirlarida Shavkat Mirziyoyev yig‘ilishda Vazirlar Mahkamasiga uch kun ichida avtomashinalar importi uchun bojxona to‘lovlarini 2 barobarga kamaytirish, avtomobillar narxini 5 foizga arzonlashtirish, mahalliylashtirish darajasini 48 foizdan 56 foizgacha oshirish bo‘yicha qaror loyihasini ishlab chiqish topshirig‘ini bergandi. Shuningdek, prezident 1-mayga qadar avtomobil sotib olishdagi navbatlarni to‘liq bartaraf etish, UzAuto Motors avtomobillari uchun oldindan to‘lovni 85 foizdan 50 foizga kamaytirish vazifasini ham qo‘ygandi.
Izoh (0)