Тошкент шаҳар Ички ишлар бош бошқармаси бошлиғи, пойтахт прокурори ва Миллий гвардия пойтахт бошқармаси бошлиғи иштирокида 2022 йилнинг илк 4 ойи якунлари бўйича ҳисобот йиғилиши бўлиб ўтди. Бу ҳақда Тошкент шаҳар ИИББ ахборот мултимедиа маркази хабар берди.
Йиғилиш аввалида пойтахт ички ишлар органлари томонидан амалга оширилган ишлар сарҳисоб қилинган. Жумладан, бевосита ходимларнинг ташаббуси билан 2 435 та жиноят, улардан 769 таси гиёҳвандлик ва психотроп воситаларининг ноқонуний савдоси билан боғлиқ жиноятлар аниқланган бўлиб, унда 217 килограммдан ортиқ гиёҳвандлик ва 24 килограммдан зиёд кучли таъсир қилувчи дори воситаларининг тарқалиб кетишининг олди олинган. Шунингдек, 7 777 та жиноят фош этилган, улардан 221 таси ўтган йилларда содир этилган жиноятлар, 537 нафар қидирувдаги шахслар ушланиб, жазо муқаррарлиги таъминланган.
Шундан сўнг, туман ИИО ФМБ бошлиқлари, туман прокурорлари, Миллий гвардия масъул раҳбарларининг ўтган вақт мобайнида пойтахт ҳудудида жиноятчиликнинг барвақт олдини олиш борасида амалга оширган ишлари ва йўл қўйилган камчиликлар бўйича ҳисоботлари тингланган.
Шу билан бирга, Тошкент шаҳар ҳудудида жиноят салмоғи юқори деб топилган 169 та маҳаллага масъул раҳбарлар бириктирилиб, уларга аниқ вазифа ва топшириқлар берилган. Шу ернинг ўзида шаҳар прокурори, ИИББ ҳамда Миллий гвардия Тошкент шаҳар бошқармаси бошлиқларининг «Хавфсиз пойтахт» профилактик ойлигини ўтказиш бўйича қўшма қарори тасдиқланиб, ижрога қаратилган.
Йиғилиш якунида ҳуқуқни муҳофаза қилиш органлари айрим раҳбарларининг фаолияти қаттиқ танқид қилиниб, 2-чорак якуни бўйича кўрсаткичлар ижобий томонга ўзгармаган тақдирда, эгаллаб турган лавозимларидан озод этилишлари тўғрисида огоҳлантирилган.
Аввалроқ Ўзбекистонда 2021 йилда 18–30 ёшдаги аёллар томонидан содир этилган жиноятлар сони 2 баравар кўпайгани тўғрисида хабар берилганди.
Изоҳ (0)