Ijtimoiy tarmoqlarda Nest One binosi oldida xodimlar norozi bo‘lib to‘plangani va yo‘lni yopib qo‘ygani aytilgan videolavhalar tarqaldi. Keyinroq tadbirkor Murod Nazarov Instagram tarmog‘i orqali chiqish qilib, vahimaga o‘rin yo‘qligini aytdi.
“Men Nest One’da turibman. 17-may, soat 15:09. Ijtimoiy tarmoqlarda vahima qilib charchatib yubordinglar. Osh yemaganinglar uchun, chaqira olmaganim uchun alamni olish bunday bo‘lmasin, iltimos. Nima keragi bor shunday vahima qilishni? Hamma joy tinch. Hamma ishlar yaxshi ketyapti. Bitta osh qilib, baloga qoldim”, — deydi tadbirkor.
“Daryo” muxbiri holat sodir bo‘lgan joyga borib, vaziyatni o‘rgandi.
Nest One qurilish binosi marketing bo‘yicha bosh mutaxassisi Maftuna Amilxonovaning ma’lum qilishicha, hodisa 17-may kuni soat 08:45 da yuz bergan.“Aslida, 2 yildan buyon har oyning 8-sanasidan 12-sanasigacha oylik beriladi. Ammo bu oy bizda shunday holat bo‘lgani uchun bir hafta oldin barchani ogohlantirdik. 4-5 kunga kechikishi haqida ogohlantirdik. Oylik kechikishining sababi texnik holat. Oxirgi muddat bizda 17-may edi. Bugun soat 08:45 da bank va kartochkalarni ishga tushishini kutmasdan, ishchilar ko‘chaga chiqdi. Ammo 09:00 bo‘lishi bilan biz ulardan telefonlarini ochib qarashlarini, kartochkaga pul tushganini aytdik. Bo‘ldi shu”, — deydi u.
Maftuna Amilxonovaning so‘zlariga ko‘ra, ushbu holat uyushtirilmagan. Shuningdek, u oyliklar kechikishi kompaniyaning moliyaviy ahvoli yomonlashgani bilan bog‘liq emasligini aytdi.
“Bu texnik nosozlik. Biznesda har xil holat bo‘ladi. Bizning kompaniyamizda bu oy shunday holat bo‘lib qoldi. Shuning uchun, barcha ogohlantirilgan. O‘zimiz bergan va’daning ustidan chiqib, 4-5 kunni ichida oyliklarni tushirib berdik. Bu birinchi marta bo‘lyapti. 2019-yildan beri ishlab kelaman, oyliklar hamisha aytilgan kunda beriladi. Hodisa birinchi marta bo‘lgani uchun biz buning ustida ishlayapmiz. Tegishli organlar bilan bu borada gaplashamiz. Boshqa bunday holat bo‘lmasligiga va’da beramiz. Holat kim tomondan uyushtirilgani haqida ma’lumot hozircha yo‘q. Bilasizlar, bankda ish 09:00 dan boshlanadi, ushbu hodisa esa 08:45 da sodir bo‘ldi. Soat 09:00 da barchaga pul tushirib berildi”, — dedi u.
Nest One vakili Murod Nazarovning Instagram sahifasida osh haqidagi gapiga: “Murod aka hazil qildilar. Endi holatni hamma tushunib turibdi. Murod aka bizning ruhiyatimizni ko‘tarib turadigan inson”, — deya qo‘shimcha qildi Maftuna Amilxonova.
Murod Nazarovning osh haqidagi gapi uning Nest One binosi tomida pishirgan oshi bilan bog‘liq bo‘lishi mumkin. 15-may kuni tadbirkor Instagram sahifasiga bino tomida o‘choqda osh pishirgani videosini joylagan edi.
Nest One mehnat muhofazasi xodimi Bahodir Musayev ham holatga izoh berdi.
“Bizda har oy maosh oyning 8-sanasidan 12-sanasigacha beriladi. Lekin bu oy texnik sabablarga ko‘ra maosh 5 kunga kechikdi. Bu narsa 3-4 kun avval bizga aytildi: “Maosh texnik sabablarga ko‘ra kechikadi”. Liftning oldida 70-80 kishi bor edi. Bu yerda esa 600 dan ortiq odam bor. Ogohlantirishni eshitmagan odamlar chiqib, rahbarlardan oylik tushmayotganining sababini so‘rashdi. Rahbarlar kelib, vaziyatni tushuntirishdi. Soat 09:40 larda oyliklar tushish boshlanganidan keyin hamma o‘z ishiga borib ishini davom ettirdi. Bu holat avval bo‘lmagan. Endi bundan keyin ham bo‘lmasligiga harakat qilamiz”, — dedi mutaxassis.
Shuningdek, voqea joyiga yetib borgan Bandlik va mehnat munosabatlari vazirligi matbuot kotibi Mavjuda Mirzayeva holat yuzasidan o‘rganish o‘tkazilishini aytdi.
“Bandlik vazirligi har doim mehnatkashlarning sharoitlarini o‘rganib kelgan. Bugungi chiqqan video yuzasidan ham biz munosabat berishimiz kerak. Bu vaziyatni, bugungi holatni davlat mehnat inspeksiyasi batafsil o‘rganadi. Hozircha bizda aniq ma’lumotlar yo‘q. Mutaxassislarimiz o‘rganishga kirishdi. Biz bu holatni bugun kechgacha o‘rganib, munosabatimizni beramiz. Ushbu holat bo‘yicha video tushdan so‘ng ijtimoiy tarmoqlarga chiqdi. Biz zudlik bilan voqea joyiga yetib keldik. Mutasaddilar bilan holat yuzasidan suhbatlar olib bordik”, — dedi vazirlik vakili.
Izoh (0)