Ijtimoiy tarmoqlarda Toshkent shahridagi 21-sonli Mehribonlik uyi tarbiyalanuvchilari mutasaddilardan yordam so‘rab murojaat qilgani aks etgan videolavha tarqalgandi. Bosh prokuratura mazkur namoyish uyushtirilgan bo‘lib chiqqanini ma’lum qildi.
Hayot Shamsutdinovning “Daryo”ga ma’lumot berishicha, mazkur xabardan so‘ng Yunusobod tumani prokurori rahbarligidagi ishchi guruh mehribonlik uyi faoliyatini tekshirgan.
“Tekshirish davomida muassasada nosog‘lom va qoniqarsiz muhit tufayli ayrim tarbiyalanuvchilarda norozilik kayfiyati paydo bo‘lgani va namoyish uyushtirilgani aniqlandi. Shu sababli 2022-yilning 26-aprel kuni 21-sonli Mehribonlik uyi direktori bilan tuzilgan mehnat shartnomasi bekor qilindi”, — deyiladi Bosh prokuratura axborot xizmati ma’lumotida.
Qo‘shimcha qilinishicha, tekshirish davomida muassasada mansabdor va moddiy javobgar shaxslarning noqonuniy xatti-harakatlari oqibatida o‘zganing ko‘p miqdordagi mablag‘larini o‘zlashtirish va rastrata qilish yo‘li bilan talon-toroj qilingani ma’lum bo‘lgan.
“Mazkur holat yuzasidan 2022-yilning 16-may kuni Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 205-moddasi (hokimiyat yoki mansab vakolatini suiiste’mol qilish) va 207-moddasi (mansabga sovuqqonlik bilan qarash) bilan jinoyat ishi qo‘zg‘atilgan.
Izoh (0)