Ижтимоий тармоқларда Nest One биноси олдида ходимлар норози бўлиб тўплангани ва йўлни ёпиб қўйгани айтилган видеолавҳалар тарқалди. Кейинроқ тадбиркор Мурод Назаров Instagram тармоғи орқали чиқиш қилиб, ваҳимага ўрин йўқлигини айтди.
«Мен Nest One’да турибман. 17 май, соат 15:09. Ижтимоий тармоқларда ваҳима қилиб чарчатиб юбординглар. Ош емаганинглар учун, чақира олмаганим учун аламни олиш бундай бўлмасин, илтимос. Нима кераги бор шундай ваҳима қилишни? Ҳамма жой тинч. Ҳамма ишлар яхши кетяпти. Битта ош қилиб, балога қолдим», — дейди тадбиркор.
«Дарё» мухбири ҳолат содир бўлган жойга бориб, вазиятни ўрганди.
Nest One қурилиш биноси маркетинг бўйича бош мутахассиси Мафтуна Амилхонованинг маълум қилишича, ҳодиса 17 май куни соат 08:45 да юз берган.«Аслида, 2 йилдан буён ҳар ойнинг 8-санасидан 12-санасигача ойлик берилади. Аммо бу ой бизда шундай ҳолат бўлгани учун бир ҳафта олдин барчани огоҳлантирдик. 4-5 кунга кечикиши ҳақида огоҳлантирдик. Ойлик кечикишининг сабаби техник ҳолат. Охирги муддат бизда 17 май эди. Бугун соат 08:45 да банк ва карточкаларни ишга тушишини кутмасдан, ишчилар кўчага чиқди. Аммо 09:00 бўлиши билан биз улардан телефонларини очиб қарашларини, карточкага пул тушганини айтдик. Бўлди шу», — дейди у.
Мафтуна Амилхонованинг сўзларига кўра, ушбу ҳолат уюштирилмаган. Шунингдек, у ойликлар кечикиши компаниянинг молиявий аҳволи ёмонлашгани билан боғлиқ эмаслигини айтди.
«Бу техник носозлик. Бизнесда ҳар хил ҳолат бўлади. Бизнинг компаниямизда бу ой шундай ҳолат бўлиб қолди. Шунинг учун, барча огоҳлантирилган. Ўзимиз берган ваъданинг устидан чиқиб, 4-5 кунни ичида ойликларни тушириб бердик. Бу биринчи марта бўляпти. 2019 йилдан бери ишлаб келаман, ойликлар ҳамиша айтилган кунда берилади. Ҳодиса биринчи марта бўлгани учун биз бунинг устида ишлаяпмиз. Тегишли органлар билан бу борада гаплашамиз. Бошқа бундай ҳолат бўлмаслигига ваъда берамиз. Ҳолат ким томондан уюштирилгани ҳақида маълумот ҳозирча йўқ. Биласизлар, банкда иш 09:00 дан бошланади, ушбу ҳодиса эса 08:45 да содир бўлди. Соат 09:00 да барчага пул тушириб берилди», — деди у.
Nest One вакили Мурод Назаровнинг Instagram саҳифасида ош ҳақидаги гапига: «Мурод ака ҳазил қилдилар. Энди ҳолатни ҳамма тушуниб турибди. Мурод ака бизнинг руҳиятимизни кўтариб турадиган инсон», — дея қўшимча қилди Мафтуна Амилхонова.
Мурод Назаровнинг ош ҳақидаги гапи унинг Nest One биноси томида пиширган оши билан боғлиқ бўлиши мумкин. 15 май куни тадбиркор Instagram саҳифасига бино томида ўчоқда ош пиширгани видеосини жойлаган эди.
Nest One меҳнат муҳофазаси ходими Баҳодир Мусаев ҳам ҳолатга изоҳ берди.
«Бизда ҳар ой маош ойнинг 8-санасидан 12-санасигача берилади. Лекин бу ой техник сабабларга кўра маош 5 кунга кечикди. Бу нарса 3-4 кун аввал бизга айтилди: «Маош техник сабабларга кўра кечикади». Лифтнинг олдида 70-80 киши бор эди. Бу ерда эса 600 дан ортиқ одам бор. Огоҳлантиришни эшитмаган одамлар чиқиб, раҳбарлардан ойлик тушмаётганининг сабабини сўрашди. Раҳбарлар келиб, вазиятни тушунтиришди. Соат 09:40 ларда ойликлар тушиш бошланганидан кейин ҳамма ўз ишига бориб ишини давом эттирди. Бу ҳолат аввал бўлмаган. Энди бундан кейин ҳам бўлмаслигига ҳаракат қиламиз», — деди мутахассис.
Шунингдек, воқеа жойига етиб борган Бандлик ва меҳнат муносабатлари вазирлиги матбуот котиби Мавжуда Мирзаева ҳолат юзасидан ўрганиш ўтказилишини айтди.
«Бандлик вазирлиги ҳар доим меҳнаткашларнинг шароитларини ўрганиб келган. Бугунги чиққан видео юзасидан ҳам биз муносабат беришимиз керак. Бу вазиятни, бугунги ҳолатни давлат меҳнат инспекцияси батафсил ўрганади. Ҳозирча бизда аниқ маълумотлар йўқ. Мутахассисларимиз ўрганишга киришди. Биз бу ҳолатни бугун кечгача ўрганиб, муносабатимизни берамиз. Ушбу ҳолат бўйича видео тушдан сўнг ижтимоий тармоқларга чиқди. Биз зудлик билан воқеа жойига етиб келдик. Мутасаддилар билан ҳолат юзасидан суҳбатлар олиб бордик», — деди вазирлик вакили.
Изоҳ (0)