“O‘zbekistonning bugungi rivojlanish bosqichi yangi Konstitutsiyani taqozo qilmoqda” — Alisher Qodirov

O‘zgarishga bo‘lgan ehtiyoj O‘zbekiston Konstitutsiyasida yaqqol ko‘rinib turibdi. Bu haqda 17-may kuni “Milliy tiklanish” demokratik partiyasi raisi Alisher Qodirov aytib o‘tdi, deb xabar bermoqda “Daryo” muxbiri.

Bugun Oliy Majlis Qonunchilik palatasida bo‘lib o‘tgan O‘zbekiston Liberal-demokratik partiyasi hamda O‘zbekiston “Milliy tiklanish” demokratik partiyasi fraksiyalarining qo‘shma yig‘ilishida Konstitutsiyaga o‘zgartirish va qo‘shimchalar kiritish borasidagi qaror loyihasi deputatlar tomonidan ma’qullangan edi.

Alisher Qodirovning ta’kidlashicha, bugungi qilingan ish — tashabbus.

Tashabbusning zarurati nimadan kelib chiqqanligini biz bayon qildik. Bu zarurat O‘zbekistonning rivojlanishining ayni shu bosqichidagi zarurat. O‘zgarishga bo‘lgan ehtiyoj Konstitutsiyamizda yaqqol ko‘rinib turibdi. Buni butun jamoatchilik e’tirof etyapti. O‘zbekistonning bugungi rivojlanish bosqichi yangi konstitusiyani taqozo qilmoqda. Bu tashabbus darajasidagi masala. “Milliy tiklanish” hamda O‘zLiDeP fraksiyasi bu tashabbusni qo‘llab-quvvatlab, qo‘shma majlisda navbatdagi belgilangan tartibdagi choralarini ko‘rish tashabbusini ilgari surishdi. Bu qanaqa? Oliy Majlis palatalarining kengashlariga biz mana shu konstitutsion islohotlarni tashkil qilish vazifasini ko‘tardik.

Endi navbatdagi vazifa — Oliy Majlis palatalari kengashlari tegishli komissiyani yig‘gan holda bu jarayonga start berishadi. Hozir aniq bir loyiha, “mana buni ko‘rib chiqamiz” degan masala yo‘q. U yerda butun jamoatchilik, biz ham partiya sifatida o‘z takliflarimizni berishimiz mumkin. Barcha takliflar jamlangan holatda bu komissiya o‘zining faoliyatini tashkil qiladi. Konstitutsiyaning qaysi moddasida, nimalarni o‘zgartirishimiz kerak, qanday o‘zgarishlarga ehtiyoj bor, degan savollarni komissiya tahlil qiladi va jamoatchilikka ochiq ravishda o‘z faoliyatini tashkil qiladi. Va bu faoliyat hech kimdan yashiringan, qaysidir masalalarni o‘zicha hal qiladigan jarayon bo‘lmaydi. Bu keng va ochiq jarayon bo‘ladi. Hozirgi jarayonda biz tashabbuslarni ko‘tardik, endi palatalarning kengashlari tegishli tartibda o‘zining vakolatidan kelib chiqib ishchi guruh yoki komissiya tashkil qiladi. Bu guruhda mutaxassislar jalb qilingan holatda kelib tushgan takliflar asosida ishini tashkil qiladi.

“Milliy tiklanish” demokratik partiyasi raisi Alisher Qodirov