«Толибон» Афғонистон армиясига 130 минг кишини қабул қилди

Афғонистон ҳукумати мамлакат қуролли кучлари таркибига 130 минг кишини олди. Бу ҳақда «Толибон» ҳукумати Мудофаа вазирлиги вакили Иноятулла Ҳаворизмий маълум қилди, деб ёзади «РБК». Аслида эса 150 минг кишини танлаб олиш режалаштирилган.

«130 мингдан ортиқ одам рўйхатга олинди ва бу жараён давом этмоқда. Рўйхатдан ўтказиш якунланганидан кейин афғонистонликлар мустақил, яхши тузилган ва содиқ армияни кўради, у афғон ўлкаси ва чегаралари хавфсизлигини таъминлайди ва ҳимоя қилади», — деди у. Ҳаворизмийнинг аниқлик киритишича, қўшинлар учун форма ишлаб чиқилмоқда.

TOLOnews маълумотларига кўра, Афғонистон ҳукумати 2021 йил августида «Толибон» томонидан эгаллаб олингунига қадар, миллий армияда қарийб 250 минг киши хизмат қилган.

Вазирликда ҳамон аёл ходимлар бор, уларнинг кўпчилиги ишламаяпти, аммо ҳозирча маош олиб турибди. Баъзи аёллар тиббий-санитария қисмларида ва идорага қарашли бошқа бўлинмаларда ҳақиқатан ҳам меҳнат қилмоқда, деди вакил. Аёлларнинг Мудофаа вазирлигида ишлаши масаласи яқин вақт ичида ҳукумат томонидан ҳал қилинади, дея хулоса қилди у.

Айни вақтда «Толибон» ҳаракатига қарши курашаётган Миллий қаршилик фронти сўнгги кунларда бўлиб ўтган жанговар тўқнашувларда «Толибон» сезиларли даражада талафот кўриб, баъзи аҳоли пунктларидан чиқиб кетганини маълум қилди.

«‘Толибон’ аъзолари охирги ўн кун ичида Панжшер ва Бағлондаги жангларда мағлуб бўлди. Ҳозирда улар Дара уездидан чекинмоқда, бугун эса Панжшердаги Шааба қишлоғида ҳамда Бағлоннинг Хост уездидаги Хаавуш ва Сучи қишлоқларида талафотлар кўрди», — дея 15 май, якшанба куни кечқурун маълум қилди Миллий қаршилик фронти вакили.

«Толибон» ушбу хабар юзасидан изоҳ бергани йўқ.

Аввалроқ Афғонистонда ҳокимият тепасида бўлган «Толибон» ҳаракати Панжшер вилоятидаги Миллий қаршилик фронти билан кечган қизғин жанглардан сўнг вилоятдаги қўшинлари сонини 5 минггача оширган эди.

2021 йил сентябрида «Толибон» худкушлар батальонини тузганини маълум қилганди.

Улар муваққат ҳукуматни ҳам 2021 йил сентябрида шакллантирганди. Ғарб мамлакатлари унинг ҳокимиятини тан олмаяпти, бироқ ҳаракат фикрича, улар тан олиниш учун барча шартларни бажарган.