Наманганда маҳалла фуқаролар йиғин раислиги учун бўлиб ўтадиган сайловларда иштирок этадиган номзодларнинг 550 нафари ёки қарийб чорак қисми аёллардан иборат. Бу ҳақда вилоят Маҳалла ва нуронийларни қўллаб-қувватлаш бошқармаси бошлиғи Аҳмаджон Аълохўжаев маълум қилди, дея хабар беради «Дарё» мухбири Азизбек Абдувалиев.
Аълохўжаевнинг билдиришича, вилоятдаги жами 782 та маҳаллада раислар сайланади. Уларда 220 мингга яқин аҳоли вакиллари овоз беради.
«Статистикага қарайдиган бўлсак, номзодларимизнинг 2141 нафари ёки 93 фоизи олий маълумотли. Уларнинг учдан бир қисми ўқитувчилар. Номзодларимизнинг 461 нафари ёки 20 фоизини амалдаги маҳалла фуқаролар йиғинлари раислари ташкил этмоқда. Раислик учун кураш олиш боришга киришганларнинг 664 нафари ёки қарийб 30 фоизи 40 ёшгача бўлганлардан иборат», — дейди Аҳмаджон Аълохўжаев.
Қайд этилишича, сайловларнинг аксарият қисми маҳаллалар ҳудудларидаги мактабларда бўлиб ўтади. Вилоятдаги сайлов ўтказиладиган объектлар ва уларга олиб борувчи кўчаларни ободонлаштириш чоралари кўрилган, тадбирга бош-қош бўладиган ишчи гуруҳ аъзолари учун зарур шарт-шароитлар яратилган.
Маълумот учун, Наманганда 16 майдан эътиборан маҳалла фуқаролар йиғинлари раислигига сайловлар бошланди. Бугунги сайловлар вилоятдаги 66 та маҳаллада бўлиб ўтмоқда.
Изоҳ (0)