Namangandagi 43 ta davlat tashkilotida xodimlarni ochiq tanlov yo‘li bilan ishga qabul qilish amaliyoti yo‘lga qo‘yildi. Bu haqda jurnalist va blogerlar uchun tashkillangan matbuot anjumanida Davlat xizmatini rivojlantirish agentligi viloyat filiali rahbarining o‘rinbosari Ibrohim Hojiyev ma’lum qildi, deya xabar beradi “Daryo” muxbiri Azizbek Abduvaliyev.
Joriy yil 1-aprel holatiga viloyatdagi davlat tashkilotlarida mavjud 3131 ta vakant shtat birligi bo‘yicha vacancy.argos.uz portali orqali tanlovlar e’lon qilingan. Mazkur vakant lavozimlar uchun 21 mingga yaqin talabgorning hujjatlari kelib tushgan. Ulardan 7585 nafari test, 5456 nafari suhbat bosqichiga o‘tkazilib, natijalari bo‘yicha jami 2302 nafar talabgor tanlov g‘olibi deb topilgan. 580 ta vakant lavozim egalari topilmay, qayta tanlovga qo‘yilgan.
Ibrohim Hojiyevga ko‘ra, ochiq tanlov yo‘li bilan ishga qabul qilish usuli boshqarma boshliqlari va kadrlar bo‘yicha mutasaddilarga ham ma’qul kelmoqda. Ular bu boradagi iltimos yoki bosimlardan xoli bo‘layotganlari, qolaversa, shu tufayli test va suhbat jarayonlaridan o‘tgan malakali xodimlarga ega bo‘layotganlarini bildirgan.
“Biz ochiq tanlov orqali ishga joylashgan sobiq nomzodlarimizning faoliyatini ham diqqat bilan kuzatib boramiz. Ularni lavozimidan bo‘shatish masalasi ham majburiy tarzda biz bilan kelishiladi. Hozirgacha 65 nafar xodim biz bilan kelishilgan holda lavozimidan ozod etildi”, — deydi Ibrohim Hojiyev.
“Daryo” muxbirining “ishdan bo‘shatishlar nima bilan bog‘liq bo‘lishi mumkin?” degan savoliga javoban filial mutasaddisi aksariyat holatlarda bu xodimning taklif etilgan maoshdan qoniqmaganligi yoki boshqa ishga o‘tishi bilan izohlanishini bildirdi.
“Bazamizda 5 mingta test savoli mavjud. Ular bilan bemalol tanishib, sinovlarga tayyorgarlik ko‘rsa bo‘ladi. Faoliyatimiz davomida qayta-qayta testlarga kirgan nomzodlarni ham ko‘rdik. Bu borada hech qanday cheklov yo‘q. Yagona cheklov — oliy o‘quv yurtlariga imtihonlarda bo‘lgani kabi taqiqlangan usullar va o‘zgalar yordamidan foydalanmaslik. Test jarayonlari to‘liq kameralar nazorati ostida, qolaversa, onlayn translyatsiya qilib boriladi. Ba’zida test va suhbat jarayonlaridan o‘tgan nomzodlarni qaytarib yuborgan paytlarimiz bo‘lgan. Chunki ekspertlarimiz tomonidan o‘tkazilgan yakuniy tekshiruv davomida ularning test payti noqonuniy usullardan foydalangani oshkor bo‘lib qolgan”, — deydi Ibrohim Hojiyev.
Matbuot anjumani yakunida jurnalist va blogerlar Davlat xizmatini rivojlantirish agentligi Namangan viloyat filialida test va suhbatlar o‘tkazilishi jarayoni bilan bevosita tanishish imkoniyatiga ega bo‘ldi.
Izoh (0)