Президент Шавкат Мирзиёев айни пайтда Фарғона вилояти фаоллари билан учрашмоқда, деб хабар берди «Дарё» мухбири.
«Фарғонада 2021 йили 801 миллион доллар экспорт бўлган экан. Бунинг учун кўп ишлар қилинди. Аввал 50 миллон ҳақида гапирар эдик. Ҳозир эса миллиардлар ҳақида гапиряпмиз. Албатта, бунинг учун ақл, билим керак», — дейди давлат раҳбари.
Шавкат Мирзиёев ҳар бир қарорга қўл қўйишдан аввал 10 марта ўйлашини ҳам қайд этиб ўтди.
«Кеча кечқурун бир масала мени қийнади. Лола опа бугун залда ўтиришлари керак эди. Аммо бетоб бўлиб қолибдилар. Ўзим бориб кўриб келай десам, шифокорлар беморни безовта қилмаслик кераклигини айтишди. Кўнглим жуда ғаш бўлди. Кўп шифокорларни юбордим. Яратгандан илтижо қиламиз, тез кунларда соғайиб кетиб, сафимизга қайцинлар», — дейди президент.
Давлат раҳбари бугун йиғилишда очиқ гаплашилишини айтди.
«Менга аниқ савол қўйинглар, саволга бугун бўлмаса ҳам эртага жавоб бераман. «Жаноб президент, ҳаммаси зўр, ест қиламиз» деманглар, савол беринглар. Мен Фарғонадан жуда кўп нарса кутяпман», — дейди Шавкат Мирзиёев.
12 май куни президент матбуот котиби Шерзод Асадов Ўзбекистон Қаҳрамони, Олтиариқ туманидаги «Нурли обод» фермер хўжалиги раҳбари Лола Муротова қаттиқ бетоб бўлиб қолгани ҳақида ёзганди.
Шавкат Мирзиёевнинг топшириғига кўра, Шуҳрат Ғаниев, ССВ вазири Беҳзод Мусаев, Президент маслаҳатчиси ўринбосари Абдурашид Жўрабоев ва президент матбуот котиби Шерзод Асадов вилоят шошилинч тиббий ёрдам марказида даволанаётган Лола Муротова ҳолидан хабар олган.
Шерзод Асадовнинг ёзишича, айни пайтда қатор тиббиёт муассасалари директорларидан иборат консилиум бошчилигида тажрибали шифокорлар томонидан керакли муолажалар олиб борилмоқда.
Изоҳ (0)