AQSH Senati respublikachi senator Rend Polning qarori tufayli Ukrainaga 40 milliard dollarlik yordam paketini taqdim etish bo‘yicha yakuniy ovoz berishni keyinga qoldirdi. Pol hujjat matniga o‘zgartirishlar kiritishni talab qilgan, deb yozmoqda Bloomberg.
Polning ta’kidlashicha, agar qonun loyihasi qabul qilinsa, 2021-yildan beri AQSHning Ukrainaga ko‘rsatgan umumiy yordami 60 milliard dollarga yetadi, bu esa AQSH Davlat departamenti budjetidan ko‘p (Davlat departamentining 2022-yilgi budjeti 58,5 milliard dollarni tashkil etgan), bunday miqdor inflyatsiyaning o‘sishini tezlashtirishi mumkin.
“Inflyatsiya o‘z-o‘zidan paydo bo‘lmaydi. Bu defitsit xarajatlari bilan bog‘liq”, — deb tushuntirdi senator.
U Ukrainaga qanchalik hamdard bo‘lishidan qat’i nazar, “hech qaysi xorijiy davlatga emas, balki AQSH Konstitutsiyasiga sodiq bo‘lishga qasamyod qilgani”ni ta’kidladi. “Kongress xarajat ustiga xarajat qilmoqchi”, — dedi senator qonun loyihasini bloklashdan oldin.
Senator qonun loyihasiga Bosh inspektor idorasini Ukraina bilan bog‘liq xarajatlarni nazorat qilishga majburlovchi o‘zgartirish kiritishni talab qilmoqda. “Siz 40 milliard dollarni hech qanday nazoratsiz berib yubormasligingiz kerak”, — dedi u.
Reuters agentligining ta’kidlashicha, Polning roziligisiz Senat qonun loyihasini qabul qilish uchun uzoqroq jarayonni bosib o‘tishi kerak bo‘ladi.
Shuningdek, bir qator respublikachilar Ukrainaga yordam to‘g‘risidagi qonun loyihasiga global oziq-ovqat inqirozi bilan bog‘liq choralar kiritilmaytganidan xavotir bildirgan. Respublikachi senator Jon Korninning fikricha, Senat keyingi hafta boshida yordam paketini ma’qullaydi.
24-fevraldan beri AQSHning Ukrainaga bergan yordami 3 milliard dollarni tashkil etdi, deb yozadi Reuters, shu bilan birga shaxsiy sanksiyalar ostida muzlatilgan mablag‘lar miqdori 30 milliard dollarni tashkil qildi.
Aprel oyi oxirida AQSH prezidenti Jo Bayden Kongressdan Kiyevni qo‘llab-quvvatlash uchun yana 33 milliard dollar ajratishni so‘ragan edi. Bayden shuningdek, Kongressdan rossiyalik oligarxlarning muzlatilgan mulklaridan Kiyevga yordamni moliyalashtirish uchun foydalanishga ruxsat so‘rash niyatida ekanini ma’lum qilgan.
AQSH Kongressining quyi – Vakillar palatasi 11-may kuni Baydenning tashabbusini ma’qullab, yordam miqdorini 40 milliard dollarga oshirdi. Qarorga 368 nafar kongressmen yoqlab, 57 nafari qarshi ovoz berdi.
Izoh (0)