Toshkent shahrining Yunusobod hamda Farg‘ona viloyatining Dang‘ara tumanlarida elektr energiya va gaz ta’minotiga noqonuniy ulanish holatlari aniqlandi, deb xabar beradi Bosh prokuratura huzuridagi departament.
Ma’lum qilinishicha, departamentning Yunusobod tumani bo‘limi tomonidan tergovga qadar tekshiruv o‘tkazilgan. Tekshiruv davomida “Hududgaz Poytaxt” gaz ta’minoti filiali xodimlari tomonidan fuqaro M.B. “Hamkorobod” MFY hududida qurilgan issiqxonasida o‘zboshimchalik bilan 80 metrli rezina shlang orqali tabiiy gaz tarmog‘iga ulanib olgan va buning natijasida 118,4 million so‘m zarar yetkazilgani aniqlangan. Biroq fuqaro M.B. “Yunusobod tumangaz” GTM bo‘limi chilangari O.X. bilan o‘zaro kelishib, go‘yoki 15 kun oldin tekshirish o‘tkazilgani yuzasidan qalbaki dalolatnoma rasmiylashtirgani ma’lum bo‘lgan.
Shuningdek, departamentning Dang‘ara tumani bo‘limi tomonidan o‘tkazilgan tergovga qadar tekshiruvda “M.” MCHJ mansabdor shaxslari ekin yerlarini sug‘orish uchun hududdagi transformatorga 55 kilovatt quvvatli suv nasosini o‘zboshimchalik bilan ulab, elektr energiyasidan noqonuniy foydalanib, tuman elektr ta’minoti korxonasi manfaatlariga 102,9 mln so‘m zarar yetkazilganligi aniqlangan.
Mazkur holatlar yuzasidan Jinoyat kodeksining tegishli moddalari bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq Energetika vazirligi qariyb 1,5 mln xonadonning 1 kunlik iste’moliga teng gazdan noqonuniy foydalanilganini aniqlangani, O‘zbekistonda 2022-yil boshidan beri 25,8 mlrd so‘mlik gazdan noqonuniy foydalanilgani to‘g‘risida xabar berilgandi.
Izoh (0)