“Qazaqstan temir joli” AJ bilan kelishilgan holda yo‘lovchi tashuvchi poyezd qatnovlari qayta tiklanmoqda, deb xabar bermoqda “O‘zbekiston temir yo‘llari”.
Qayd etilishicha, 15-may kuni 647/648-sonli Nukus—Beyneu—Nukus yo‘nalishidagi yo‘lovchi poyezdining qatnovni boshlanadi. Shuningdek, 16-maydan boshlab Olmaota-2—Toshkent—Olmaota-2 yo‘nalishida 1/2-sonli (“Tulpar-Talgo”) poyezd qatnovi yo‘lga qo‘yiladi. Yuqorida ko‘rsatilgan reyslarning davriyligi Toshkentdan haftasiga 3 marta amalga oshiriladi.
Boshqa qo‘shni davlatlar bilan temiryo‘l yo‘nalishlarining qayta tiklanishi tomonlarning kelishuviga asosan bosqichma bosqich ochilishi kutilmoqda.
Qozog‘iston va O‘zbekiston davlat chegarasi orqali o‘tish punktlarida belgilangan tartibda o‘rnatilgan cheklov choralari talablariga rioya qilish lozim. Xususan, qo‘shni davlat chegarasi orqali o‘tish punktlari orqali Qozog‘istonga kelgan barcha shaxslar PZR usuli bilan COVID-19 ga test sinovidan o‘tgani haqida ma’lumotnoma taqdim etishi shart (qozoq, rus yoki ingliz tilida). Mazkur ma’lumotnoma Qozog‘iston davlat chegarasidan o‘tishdan oldin kamida 72 soatdan ko‘p bo‘lmagan muddatda bo‘lishi shart.
Ma’lumotnoma talab qilinmaydigan shaxslar:
- 5 yoshgacha bo‘lgan bolalar, agar ularni kuzatuvchi (birga bo‘lgan) shaxsda ushbu ma’lumotnoma mavjud bo‘lsa;
- Qozog‘iston Respublikasi hukumat delegatsiyalari a’zolari,
- lokomotiv brigadalari, temir yo‘l, dengiz va daryo transporti orqali tashishlarda faoliyat olib borayotgan shaxslar;
- Qozog‘istonda COVID-19 ga qarshi revaksinatsiya yoki to‘liq emlash kursini olgan shaxslar (agar ikkinchi komponentni olganidan so‘ng Qozog‘iston chegarasini kesib o‘tish vaqtida 6 oydan oshmasa);
- Qozog‘iston Bosh davlat sanitariya vrachi qaroriga ko‘ra mamlakat hududida haqiqiy deb topilgan COVID-19 ga qarshi emlash uchun pasport/sertifikat/ma’lumotnoma bergan shaxslarga.
Tana harorati yuqori bo‘lgan shaxslar aniqlangan holatlarda, ma’lumotnomaning mavjudligidan qat’i nazar, yuqumli shifoxonada izolyatsiya qilinadi.
Eslatib o‘tamiz, 2020-yilning mart oyida COVID-19 koronavirus pandemiyasi tufayli qariyb butun dunyo mamlakatlarda xalqaro yo‘nalishidagi yo‘lovchi poyezd qatnovlari to‘xtatildi. Ikki yillik cheklovlardan so‘ng, qator davlatlar tomonidan yo‘lovchi poyezd yo‘lovchilari uchun chegaralarni bosqichma-bosqich ochish borasida sa’yi-harakatlar amalga oshirila boshlandi.
O‘zbekiston—Qozog‘iston temiryo‘l qatnovlarining tiklanish jarayoni
O‘zbekistonda ilk bor koronavirus aniqlangan 2020-yil 16-martdan boshlab temiryo‘l transporti qatnovlari to‘xtatilgan edi. 2020-yilning 15-avgustidan mahalliy avia va temiryo‘l qatnovlari bosqichma-bosqich tiklangan. Ikki yillik cheklovlardan so‘ng, qator davlatlar tomonidan poyezd yo‘lovchilari uchun davlat chegaralarini bosqichma-bosqich ochish borasida sa’y-harakatlar boshlangan. Birinchi xalqaro yo‘lovchi poyezdi 1-aprel kunidan boshlab Nukus—Beyneu—Nukus yo‘nalishi bo‘yicha qatnay boshlashi xabar qilingandi. Shuningdek, 2-maydan boshlab haftada uch marotaba Olmaota-2—Toshkent—Olmaota-2 yo‘nalishida 1/2-sonli poyezd qatnovi yo‘lga qo‘yilishi ham rejalashtirilgandi. Mart oyi so‘nggida Qozog‘istonda karantin cheklovlari joriy etilgani sabab Nukus—Beyneu va Toshkent—Olmaota yo‘nalishidagi xalqaro yo‘lovchi poyezdlari qatnovini boshlash sanasi noma’lum muddatga ko‘chirilgandi.
Izoh (0)