O‘zbekistonda 2022-yil boshidan beri 25,8 mlrd so‘mlik gazdan noqonuniy foydalanilgani aniqlandi

Energetika vazirligi shtabi tomonidan 2022-yilning yanvar—mart oylari davomida iste’molchilarning tabiiy gazdan foydalanish holatlari tahlil qilindi, deb xabar beradi vazirlik matbuot xizmati.

O‘tkazilgan tadbirlar davomida o‘tgan 3 oyda respublika bo‘yicha 765 ta holatda ulurji iste’molchilar tomonidan amaldagi qoidalarga rioya etmagan holda 28 million 398 ming kub metr hajmdagi tabiiy gazdan noqonuniy va nooqilona foydalanish holatlari aniqlangan. Buning natijasida gaz ta’minoti korxonalari manfaatlariga 25 milliard 831 million so‘m zarar yetkazilgan.

Ushbu miqdordagi tabiiy gaz 4 million xonadonning bir kunlik iste’molini tashkil qiladi.

Noqonuniy foydalanish holatlarining eng ko‘pi — Farg‘ona, Toshkent, Jizzax, Buxoro va Navoiy viloyatlarida aniqlangan. Barcha holatlar bo‘yicha tegishli hujjatlar rasmiylashtirilib huquqni muhofaza qiluvchi organlarga taqdim etilgan.

Eslatib o‘tamiz, Energetika vazirligi shtabi tomonidan mart oyining o‘tgan 15 kuni davomida iste’molchilarning tabiiy gazdan foydalanish holatlari tahlil qilinganda uch viloyatda 7,6 milliard so‘mlik gaz o‘g‘irlangani aniqlangandi. Ushbu holatlar bo‘yicha tegishli hujjatlar rasmiylashtirilib huquqni muhofaza qiluvchi organlarga taqdim etilgan.