Шавкат Мирзиёев ҳузурида 11 май куни ўтказилган йиғилиш кун тартибидан фавқулодда вазиятларнинг олдини олиш масаласи ҳам ўрин олди. Бу ҳақда президент матбуот котиби хабар қилди.
Қайд этилишича, март—май ойларида кучли ёғингарчилик оқибатида Бухоро, Жиззах, Наманган, Самарқанд, Сурхондарё, Сирдарё ва Тошкент вилоятларида 15 га яқин йирик сел ва кўчкилар содир бўлган. Оқибатда 9 нафар инсон ҳалок бўлган. 245 та хонадон, 19 та кўприк зарар кўрди, 450 дан ортиқ бош чорва моллари нобуд бўлган.
Бунга сел ва кўчки хавфи юқори ҳудудларда йиллар давомида бетартиб пала-партиш суғорилгани ҳам сабаб бўлмоқда. Шу муносабат билан мутасаддиларга:
- тоғ дарёлари ва сойлари, сел йўллари жойлашган ҳудудларда туну-кун ишлайдиган штаблар ташкил этиш ва қутқарув отрядларини кўпайтириш;
- дарё қирғоқлари, сув омборлари, селга қарши иншоотларнинг фавқулодда вазиятларга шайлик ҳолатини ўрганиб, уларни мустаҳкамлаш;
- хавфли ҳудудларда яшаётган хонадонларни хавфсиз ҳудудларга доимий кўчириш чораларини кўриш бўйича топшириқ берилган.
Маълумот учун, Волгабўйи ҳудудларидан нам ва нисбатан салқин ҳаво массалари кириб келиб, кучли ёғингарчилик кузатилгани сабаб Ўзбекистоннинг айрим ҳудудлари, хусусан, Жиззах, Сирдарё, Сурхондарё вилоятларида сел оқимлари ва тошқинлар юзага келди. Пойтахт кўчаларини ҳам сув босди.
Сурхондарё вилояти Сариосиё туманида 10 май куни сел оқимлари икки фуқарони оқизиб кетди. 11 май куни навбати билан тошқинда қолиб кетган фуқаролар жасади топилди (1, 2).
Мавзуга доир:
- «Турли важлар билан фермерлар ғалласини олиб қўйиш қатъиян тақиқланади» — Шавкат Мирзиёев
- Ўзбекистонда Қишлоқ хўжалиги жамғармаси харид қилган 1 млн 783 минг тонна буғдой эҳтиёжга қараб ойма-ой биржага чиқарилади
- Ўзбекистонда 1 июндан бошлаб ғаллани давлат томонидан сотиб олиш ва сотишда бозор нархларига ўтилади
Изоҳ (0)