Наманган ҳокими Австрияда вилоятга инвестициялар жалб этиш бўйича музокаралар олиб борди

Наманган вилояти ҳокими Шавкат Абдураззақов бошчилигидаги делегация ҳамкорликни ривожлантириш, ўзаро манфаатли шартномалар имзолаш мақсадида Австрия пойтахти Венага келди. Бу ҳақда «Дарё» мухбири Азизбек Абдувалиев хабар бермоқда.

Делегациянинг UniCredit Bank Austria департаменти директори Дорис Пигниттер билан учрашуви бўлиб ўтди. Австриянинг энг йирик банки Наманган вилоятидаги лойиҳаларни молиялаштиришга тайёр эканини билдирди.

Учрашув давомида қиймати 8,8 миллион евро бўлган Наманган кардиология марказини модернизация қилиш лойиҳаси бўйича тақдимот ўтказилди. Шунингдек, банк вакиллари билан вилоят травматология марказини модернизация қилиш бўйича ҳам музокаралар олиб борилди.

Делегациянинг Австрия назорат банки (Österreichische Kontrollbank AG) раҳбари, доктор Хелмут Беринкопф билан учрашуви бўлиб ўтди.

Томонлар Намангандаги ижтимоий лойиҳаларни имтиёзли кредитлар асосида молиялаштириш бўйича музокаралар ўтказди ва дастлабки келишувларга эришди.

Шавкат Абдураззақов Венада Қуйи Австрия федерал ери вице-губернатори Ёхен Даннингер бошчилигидаги расмийлар билан ҳам музокаралар ўтказди. Музокаралар давомида икки томонлама муносабатларни ривожлантиришга қаратилган ўзаро ҳамкорлик меморандуми имзоланди.

Келгусида ҳудудлар ўртасида савдо-иқтисодий, ижтимоий-маданий, туризм ва бошқа йўналишларда алоқаларни ривожлантириш мақсадида йўл харитаси ишлаб чиқилади ва ҳаётга татбиқ этилади.

Наманган делегациясининг Австрияга сафари давом этмоқда.