“Borussiya D” hujumchisi Erling Holand yaqin kunlarda rasman “Manchester Siti” futbolchisiga aylanadi. Bu haqda jurnalist Nikolo Skira xabar berdi.
Manbaga ko‘ra, “shaharliklar” o‘tgan haftada 21 yoshli norvegiyalik hujumchining transferi bo‘yicha kelishuvni yopgan.
Avvalroq Manchester klubi 21 yoshli futbolchining agentlari bilan kelishuvga erishgani va norvegiyalik futbolchi haftasiga 500 ming funtdan ortiq maoshga ega 5 yillik shartnoma imzolashi haqida xabar berilgandi. Erling haftasiga 385 ming funt maosh oladigan “Manchester Siti” yarim himoyachisi Kevin de Bryuyneni ortda qoldirib, APLdagi eng ko‘p maosh oladigan futbolchiga aylanishi qo‘shimcha qilingan.
Qayd etish kerak, Holandni “Manchester Siti”dan tashqari, “Real” va “Barselona” ham o‘z safiga qo‘shib olishni xohlagandi.
Holand “Borussiya” bilan 2020-yil boshida shartnoma imzolagan. Uning “Zalsburg”dan transferi nemis jamoasiga 20 million yevroga tushgan. Holand “arilar” safida 88 o‘yinda 85 ta gol urdi va 23 ta golli uzatmani amalga oshirdi. Transfermarkt portali hujumchini 150 million yevroga baholagan.
Izoh (0)