“Atletiko” 2018-yildan beri ilk bor “Real”ni mag‘lub etdi.
“Matraschilar” Ispaniya La Ligasi 35-turi doirasida o‘z maydonida “qirollik klubi”dan 1:0 hisobida ustun keldi.
Bugunga qadar Diego Simeone shogirdlari barcha musobaqalarda qatorasiga 8 ta o‘yinda raqibni yenga olmagandi. So‘nggi g‘alaba 2018-yilning 15-avgustida UEFA Superkubogida qayd etilgandi — 4:2. Shuningdek, bu “Atletiko” uchun “Vanda Metropolitano”da “Real” ustidan qozonilgan ilk g‘alaba bo‘ldi.
“Atletiko”ning La Ligada “Real”ga qarshi kechgan uchrashuvlardagi g‘alabasiz seriyasi esa 2016-yilning fevral oyidan beri davom etib kelgan va 11 o‘yinni tashkil qilgan.
Eslatib o‘tamiz, “Real” 34-turda “Espanyol”ni mag‘lub etib, muddatidan avval Ispaniya chempionligini qo‘lga kiritgandi. “Atletiko” esa 64 ochko bilan 4-o‘rinda bormoqda.
Izoh (0)