“Xalqaro qishloq xo‘jaligi universitetini tashkil qilish chora-tadbirlari to‘g‘risida”gi prezident qarori qabul qilindi. Bu haqda Telegram’dagi “Huquqiy axborot” kanali xabar qildi.
Qarorga ko‘ra, Buyuk Britaniya Qirollik qishloq xo‘jaligi universiteti (Royal Agriculture University) bilan hamkorlikda Toshkent shahrida Xalqaro qishloq xo‘jaligi universiteti tashkil etilgan. Universitet Qishloq xo‘jaligi vazirligi va Buyuk Britaniya Qirollik qishloq xo‘jaligi universiteti tomonidan ta’sis etiladigan to‘liq akademik va moliyaviy mustaqil bo‘lgan davlat ishtirokidagi oliy ta’lim muassasasi hisoblanadi.
Universitetda ta’lim grant va to‘lov-kontrakt asosida amalga oshiriladi. 2022/2023-o‘quv yilidan Xalqaro qishloq xo‘jaligi universitetida quyidagi bakalavriat ta’lim yo‘nalishlari tashkil etiladi:
- Aqlli qishloq xo‘jaligi (Smart Agriculture);
- Agronomiya;
- Biotexnologiya;
- Agroiqtisodiyot;
- Chorvachilikni rivojlantirish;
- Oziq-ovqat xavfsizligi;
- Agrologistika.
Qarorga ko‘ra, universitetda davlat muassasasi shaklidagi Qishloq xo‘jaligi sohasida kadrlarni qayta tayyorlash va ularning malakasini oshirish tarmoq markazi (Capacity Building Center) tashkil etilgan. Shuningdek, 2022-yil yakunigacha talabalar, magistrant va ilmiy izlanuvchilar hamda professor-o‘qituvchilarning ilmiy ishlanmalari asosida startap-loyihalarni yaratish va amaliyotga tatbiq etish bilan shug‘ullanuvchi davlat muassasasi shaklidagi “Agro Innovation Incubator” markazi tashkil etiladi.
Bundan tashqari, universitet jalb etilgan xorijiy mutaxassislar, mahalliy xodimlarning ish haqi va boshqa to‘lovlar miqdorini mustaqil belgilaydi. Rektor Kuzatuv kengashi bilan kelishgan holda qishloq xo‘jaligi vaziri tomonidan lavozimga tayinlanadi va lavozimidan ozod qilinadi. Bunda universitet rektori O‘zbekiston Respublikasi tomonidan ko‘rsatiladi.
Eslatib o‘tamiz, 2021-yilning noyabr oyida Qishloq xo‘jaligi vazirligi delegatsiyasi Angliyaning Glostershir grafligidagi Sayrensester shahrida joylashgan Qirollik qishloq xo‘jaligi universiteti (Royal Agricultural University, RAU)da muzokaralar o‘tkazgandi. Tashrif O‘zbekistonda tashkil etilayotgan Xalqaro qishloq xo‘jaligi universiteti uchun ta’lim dasturlari va boshqa masalalarni ishlab chiqish maqsadida amalga oshirilgan.
Shavkat Mirziyoyev huzurida 27-aprel kuni o‘tkazilgan yig‘ilishda qishloq xo‘jaligi sohasi mas’ullariga bir qator vazifalar topshirilgan. Jumladan, Xalqaro qishloq xo‘jaligi universiteti 2022/2023-o‘quv yilidan faoliyatini boshlaydi.
Izoh (0)