«Халқаро қишлоқ хўжалиги университетини ташкил қилиш чора-тадбирлари тўғрисида»ги президент қарори қабул қилинди. Бу ҳақда Telegram’даги «Ҳуқуқий ахборот» канали хабар қилди.
Қарорга кўра, Буюк Британия Қироллик қишлоқ хўжалиги университети (Royal Agriculture University) билан ҳамкорликда Тошкент шаҳрида Халқаро қишлоқ хўжалиги университети ташкил этилган. Университет Қишлоқ хўжалиги вазирлиги ва Буюк Британия Қироллик қишлоқ хўжалиги университети томонидан таъсис этиладиган тўлиқ академик ва молиявий мустақил бўлган давлат иштирокидаги олий таълим муассасаси ҳисобланади.
Университетда таълим грант ва тўлов-контракт асосида амалга оширилади. 2022/2023-ўқув йилидан Халқаро қишлоқ хўжалиги университетида қуйидаги бакалавриат таълим йўналишлари ташкил этилади:
- Ақлли қишлоқ хўжалиги (Smart Agriculture);
- Агрономия;
- Биотехнология;
- Агроиқтисодиёт;
- Чорвачиликни ривожлантириш;
- Озиқ-овқат хавфсизлиги;
- Агрологистика.
Қарорга кўра, университетда давлат муассасаси шаклидаги Қишлоқ хўжалиги соҳасида кадрларни қайта тайёрлаш ва уларнинг малакасини ошириш тармоқ маркази (Capacity Building Center) ташкил этилган. Шунингдек, 2022 йил якунигача талабалар, магистрант ва илмий изланувчилар ҳамда профессор-ўқитувчиларнинг илмий ишланмалари асосида стартап-лойиҳаларни яратиш ва амалиётга татбиқ этиш билан шуғулланувчи давлат муассасаси шаклидаги «Agro Innovation Incubator» маркази ташкил этилади.
Бундан ташқари, университет жалб этилган хорижий мутахассислар, маҳаллий ходимларнинг иш ҳақи ва бошқа тўловлар миқдорини мустақил белгилайди. Ректор Кузатув кенгаши билан келишган ҳолда қишлоқ хўжалиги вазири томонидан лавозимга тайинланади ва лавозимидан озод қилинади. Бунда университет ректори Ўзбекистон Республикаси томонидан кўрсатилади.
Эслатиб ўтамиз, 2021 йилнинг ноябрь ойида Қишлоқ хўжалиги вазирлиги делегацияси Англиянинг Глостершир графлигидаги Сайренсестер шаҳрида жойлашган Қироллик қишлоқ хўжалиги университети (Royal Agricultural University, RAU)да музокаралар ўтказганди. Ташриф Ўзбекистонда ташкил этилаётган Халқаро қишлоқ хўжалиги университети учун таълим дастурлари ва бошқа масалаларни ишлаб чиқиш мақсадида амалга оширилган.
Шавкат Мирзиёев ҳузурида 27 апрель куни ўтказилган йиғилишда қишлоқ хўжалиги соҳаси масъулларига бир қатор вазифалар топширилган. Жумладан, Халқаро қишлоқ хўжалиги университети 2022/2023-ўқув йилидан фаолиятини бошлайди.
Изоҳ (0)