Samarqand viloyati Payariq tumanida 3-may kuni kuchli sel oqibatida aylanma yo‘l yuvilib ketdi. Bu haqda viloyat Favqulodda vaziyatlar boshqarmasi xabar qildi.
Qayd etilishicha, ayni kunlarda Samarqand viloyatida yog‘ingarchilik kuchli bo‘lishi oqibatida ayrim hududlarga sel kelish holatlari kuzatilmoqda. Xususan, Payariq tumani “G‘allakor” mahallasi hududidan o‘tuvchi 4R-43 yo‘lining 76-kilometrida qurilayotgan ko‘prikning vaqtincha o‘tib turish uchun qurilgan aylanma yo‘li sel kelishi oqibatida yuvib ketilgan.
Sel kelish oqibatida jarohatlangan va halok bo‘lganlar yo‘q.
“Ayni daqiqalarda viloyat FVB rahbarligida tegishli tashkilotlarning mutaxassislari tomonidan vaziyat oqibatlarini bartaraf etish choralari ko‘rilmoqda”, — deyiladi xabarda.
Eslatib o‘tamiz, “O‘zgidromet” 3—5-aprel kunlari yog‘ingarchilik oqibatida Qashqadaryo, Surxondaryo, Samarqand, Jizzax, Navoiy, Toshkent, Namangan, Andijon va Farg‘ona viloyatlarida sel-suv toshqin hodisalari yuzaga kelishi mumkinligi haqida ogohlantirgandi.
3-may kuni esa O‘zbekistonning 4 ta hududiga sel keldi. Favqulodda vaziyatlar vazirligi sel oqibatlari va ularni bartaraf etish tadbirlari haqida ma’lumot berdi.
Izoh (0)