Самарқанд вилояти Пайариқ туманида 3 май куни кучли сел оқибатида айланма йўл ювилиб кетди. Бу ҳақда вилоят Фавқулодда вазиятлар бошқармаси хабар қилди.
Қайд этилишича, айни кунларда Самарқанд вилоятида ёғингарчилик кучли бўлиши оқибатида айрим ҳудудларга сел келиш ҳолатлари кузатилмоқда. Хусусан, Пайариқ тумани «Ғаллакор» маҳалласи ҳудудидан ўтувчи 4Р-43 йўлининг 76-километрида қурилаётган кўприкнинг вақтинча ўтиб туриш учун қурилган айланма йўли сел келиши оқибатида ювиб кетилган.
Сел келиш оқибатида жароҳатланган ва ҳалок бўлганлар йўқ.
«Айни дақиқаларда вилоят ФВБ раҳбарлигида тегишли ташкилотларнинг мутахассислари томонидан вазият оқибатларини бартараф этиш чоралари кўрилмоқда», — дейилади хабарда.
Эслатиб ўтамиз, «Ўзгидромет» 3—5 апрель кунлари ёғингарчилик оқибатида Қашқадарё, Сурхондарё, Самарқанд, Жиззах, Навоий, Тошкент, Наманган, Андижон ва Фарғона вилоятларида сел-сув тошқин ҳодисалари юзага келиши мумкинлиги ҳақида огоҳлантирганди.
3 май куни эса Ўзбекистоннинг 4 та ҳудудига сел келди. Фавқулодда вазиятлар вазирлиги сел оқибатлари ва уларни бартараф этиш тадбирлари ҳақида маълумот берди.
Изоҳ (0)