Toshkent shahar hokimi Jahongir Ortiqxo‘jayev poyga ishqibozi bo‘lgan poytaxt yoshlarining qiziqishi va takliflarini o‘rganib, ular uchun maxsus joy tashkil etish masalasini ko‘rib chiqish topshirig‘ini berdi.
Poytaxt hokimi Toshkent shahar IIBB boshlig‘i Aziz Toshpo‘latovga poytaxt ko‘chalarida poyga va drift qiladigan avtomashina haydovchilarini 5-10 sutkaga qamab qo‘ymasdan, ular bilan suhbatlashib, qiziqishlarini o‘rganish kerakligini aytgan.
“Biz shuni ko‘ryapmizki, oldimizda biror muammo chiqsa yoki ichki ishlar xodimlarining ishlashiga ‘komfort’ buzilsa, taqiqlash bilan ishlayapmiz. Drift qilish, poyga o‘ynashga yoshlarda ehtiyoj bor, buni o‘rganish kerak”, — deydi Ortiqxo‘jayev.
Hokim yoshlarning qiziqishini o‘ldirmaslik, ular uchun alohida yo‘nalish ajratish masalasini ko‘rib chiqish zarur, deb hisoblaydi. “Dunyoda bu sport darajasiga chiqqan. Biz har narsaga taqiq qo‘ymasdan, yoshlarning fikrini olgan holda Toshkent shahri atrofida ko‘pgina bo‘sh joylar bor, masalan, DOSAAF avtomaktab poligonlari bunga mos keladi”, — deya ta’kidlagan u.
Ortiqxo‘jayevning aytishicha, ushbu poligon va yo‘laklardan xalqaro poyga musobaqalarini tashkil etish va sayyohlarni jalb qilish uchun foydalanish mumkin. IIBB boshlig‘i bu bo‘yicha takliflar tayyorlashga va’da bergan.
Izoh (0)