Qashqadaryo viloyati Chiroqchi tumanida 26-aprel kuni bir guruh fuqarolar YPX xodimlariga qarshilik ko‘rsatgani xabar qilingandi. Ichki ishlar vazirligining ma’lum qilishicha, xodimlarga tajovuz qilgan shaxslar jazolangan.
Shu kuni soat 17:30 larda YPX inspektorlari B.B. va B.K. Lacetti xizmat mashinasida tumandagi oziq-ovqat dehqon bozori ro‘parasida xizmat vazifasini olib borayotgan bo‘lgan. Xodimlar ko‘chada yuzaga kelgan tirbandlikning oldini olish maqsadida taqiqlangan joyda to‘xtab turgan avtomobil haydovchilarini ovoz kuchaytirgich orqali qoidalarga rioya etishga chaqirgan.
Biroq fuqarolar N.Sh., N.B. va Q.A. YPX inspektori boshqaruvidagi avtomashinaning harakatlanishiga yo‘l qo‘ymasdan, yoniga boshqa fuqarolarni to‘plab, xizmat avtomashinasini to‘xtatgan. YPX xodimlarini xizmat kiyimi, bodikamerasi va ko‘krak nishonini yulib olib, ularning qonuniy faoliyatiga faol qarshilik ko‘rsatgan.
Qayd etilishicha, jamoat tartibini buzishda va xodimlarga tajovuz qilishda qatnashgan barcha fuqarolar tuman IIBga olib kelinib, shaxsi aniqlangan. Holat yuzasidan Jinoyat kodeksining 219-moddasi 2-qismi bilan jinoyat ishi qo‘zg‘atilib, xodimlarga qarshilik ko‘rsatgan shaxslar ehtiyot chorasi sifatida qamoqqa olingan.
“Ukam telefon qildi, YPX xodimlari bilan urishib qoldik dedi. Darrov yetib bordim. Xodimlardan birining pogonini yulib oldim. Pastga qarasam, bodikamerasi ham turgan ekan. Ikkisini olib, orqaga uzatdim, kim olganini bilmayman.
Qiziqqonlikda bilmasdan qilib qo‘ydim. O‘zimga kelgan vaqtim kech bo‘lgandi. Xato qildim, qaytarilmaydi”, — deydi qoidabuzar fuqarolardan biri.
“O‘rtog‘im bilan YPX xodimi tortishib qoldi. Keyin boshqa fuqarolarning gijgijlaganiga uchib, o‘rtog‘imni mashinadan tushirish uchun xodimning oyoqlaridan tortib, qarshilik qildim.
Xalqdan kechirib so‘rayman. Boshqa qaytarilmaydi”, — degan yana biri.
Qashqadaryo IIB matbuot xizmati “Daryo”ga aniqlik kiritilishicha, Jinoyat ishlari bo‘yicha Chiroqchi tuman sudi tomonidan voqeada ishtirok etgan 9 kishi ustidan Ma’muriy javobgarlik to‘g‘risidagi kodeksning 183-moddasi, 194-moddasi 1-qismi, 195-moddasi, 201-moddasi 1-qismi bilan ma'muriy ish ko‘rib chiqilgan. Sud qarori bilan ulardan 7 nafariga 15 sutka ma’muriy qamoq jazosi tayinlangan. 2 nafari ogohlantirish olgan.
Bundan tashqari, Dehqonobod tumani prokuraturasi tomonidan voqeada ishtirok etgan yana 4 kishiga jinoyat ishi qo‘zg‘atilgan.
Mavzuga doir:
Izoh (0)