Vengriyaning OTP Bank’i Rossiya bozorini tark etmoqchi. Bu haqda Reuters xabar bermoqda.
Bank rahbari Shandor Chani ta’kidlashicha, kompaniyaga Ukraina hukumati katta bosim o‘tkazmoqda.
Bizdan Rossiyadagi bankimizni sotishni yoki barcha operatsiyalarni to‘xtatishni talab qilishmoqda, — dedi Chani.
Uning ta’kidlashicha, bank faqatgina tashqi bosim tufayli biznesni sotmaydi. Rossiyani tark etish qarori faqat mos xaridor topilganda qabul qilinishi mumkin.
OTP Bank “Ipoteka bank”ni sotib olishi kerak edi
Avvalroq OTP Bank O‘zbekistonga “Ipoteka bank”ni sotib olish bo‘yicha bitimni kechiktirish iltimosi bilan murojaat qilgan edi.
Sabab — Rossiyaning Ukrainaga bostirib kirishi oqibatlari. Kelishuv deyarli tayyor edi, ammo urush boshlandi va noaniqlik paydo bo‘ldi.
Bundan tashqari, 24-fevraldan keyin bank aksiyalari 30 foizga arzonlashdi. Bu Vengriyaning Rossiya—Ukraina mojarosida tutgan pozitsiyasining ta’siri — mamlakat rasmiylari yaqinda Rossiya gazini rublga sotib olishga tayyor ekanliklarini e’lon qilgan, avvalroq esa Ukrainaga o‘z hududi orqali qurol-yarog‘ yetkazib berishni taqiqlagan edi.
Bulardan kelib chiqib, bank vaziyat aniqlangunga qadar bitimni 2-3 oyga kechiktirishni so‘radi.
Vengriyaning OTP Bank’i “Ipoteka bank”ni xususiylashtirishda ishtirok etishi 2021-yilning kuzida ma’lum bo‘lgan edi. Shartnoma 2022-yil boshida imzolanishi kutilgan edi.
Izoh (0)