Венгриянинг OTP Bank’и Россия бозорини тарк этмоқчи. Бу ҳақда Reuters хабар бермоқда.
Банк раҳбари Шандор Чани таъкидлашича, компанияга Украина ҳукумати катта босим ўтказмоқда.
Биздан Россиядаги банкимизни сотишни ёки барча операцияларни тўхтатишни талаб қилишмоқда, — деди Чани.
Унинг таъкидлашича, банк фақатгина ташқи босим туфайли бизнесни сотмайди. Россияни тарк этиш қарори фақат мос харидор топилганда қабул қилиниши мумкин.
OTP Bank «Ипотека банк»ни сотиб олиши керак эди
Аввалроқ OTP Bank Ўзбекистонга «Ипотека банк»ни сотиб олиш бўйича битимни кечиктириш илтимоси билан мурожаат қилган эди.
Сабаб — Россиянинг Украинага бостириб кириши оқибатлари. Келишув деярли тайёр эди, аммо уруш бошланди ва ноаниқлик пайдо бўлди.
Бундан ташқари, 24 февралдан кейин банк акциялари 30 фоизга арзонлашди. Бу Венгриянинг Россия—Украина можаросида тутган позициясининг таъсири — мамлакат расмийлари яқинда Россия газини рублга сотиб олишга тайёр эканликларини эълон қилган, аввалроқ эса Украинага ўз ҳудуди орқали қурол-яроғ етказиб беришни тақиқлаган эди.
Булардан келиб чиқиб, банк вазият аниқлангунга қадар битимни 2-3 ойга кечиктиришни сўради.
Венгриянинг OTP Bank’и «Ипотека банк»ни хусусийлаштиришда иштирок этиши 2021 йилнинг кузида маълум бўлган эди. Шартнома 2022 йил бошида имзоланиши кутилган эди.
Изоҳ (0)