Jizzax viloyatining Forish tumani “Egizbuloq” mahallasidagi seldan zarar ko‘rgan 43 ta xonadonda tozalash ishlari yakunlandi. Mazkur xonadonlardan 1184 tonna chiqindi olib chiqildi. Bu haqda “Daryo”ga viloyat Favqulodda vaziyatlar boshqarmasi axborot xizmati rahbari Farrux Abdurahmonov xabar berdi.
Ma’lum qilinishicha, hududdagi tozalash ishlari 913 nafar hasharchi hamda 108 texnika yordamida amalga oshirilgan.
“Mahallada sel oqibatlarini bartaraf etish maqsadida viloyatdagi korxona, tashkilot, muassasalardan ko‘plab ko‘ngillilar ham yordamga kelgan. Viloyat favqulodda vaziyatlarning oldini olish va bunday vaziyatlarda harakat qilish davlat tizimi xizmatlari tomonidan jami 913 nafar xodim hamda 108 texnika jalb qilingan”, — deydi Farrux Abdurahmonov.
Ta’kidlanishicha, viloyat Favqulodda vaziyatlar boshqarmasining 180 nafar shaxsiy tarkibi va maxsus texnikalari sel oqibatlarini bartaraf etish, ta’mirlash-tiklash ishlarini tashkil etish uchun 14 ta guruhga bo‘lingan holda xizmat qilmoqda.
“Hududdagi talafot yetgan qabriston tiklanib, kanalizatsiya tizimlari, suv tozalash inshootlari soz holatga keltirilmoqda. Shu bilan bir qatorda mazkur obyektlarda ham dezinfeksiya tadbirlari amalga oshirildi. Shuningdek, zararlangan hududlarda to‘plangan 29 bosh uy hayvonlari jasadi sanitariya qoidalariga muvofiq ko‘mildi. Shu bilan bir qatorda 3 ta tez tibbiy yordam brigadasi hamda 158 nafar tibbiyot xodimi tomonidan aholini tibbiy ko‘rikdan o‘tkazish ishlari tashkil etilib, 6 turdagi dori hamda antiseptik vositalar tarqatilmoqda”, — deydi mas’ul.
Qo‘shimcha qilinishicha, seldan jabrlangan aholiga zaruriy yordam ko‘rsatishni tashkil etish maqsadida, Favqulodda vaziyatlar vazirligining +998955041050 hamda Jizzax viloyati FVBning 1050, 101 Call-center faoliyati yo‘lga qo‘yilib, murojaatlar qabul qilinishi tashkil etilgan.
“Hozirga qadar fuqarolardan jami 500 dan ortiq murojaat kelib tushdi. Ularning murojaatlari bo‘yicha tizimlashtirilgan holda zarur tadbirlar ko‘rilib, o‘z vaqtida yordam ko‘rsatilmoqda. Bundan tashqari, mahalla hududida seldan talafot ko‘rganlarga gumanitar yordam ko‘rsatish shtabiga nafaqat Jizzax viloyatidan, balki respublikamizning boshqa hududlaridan ham oziq-ovqat, qishloq xo‘jalik mahsulotlari, kiyim-kechak, qurilish materiallari karvonlari kelyapti. Ushbu gumanitar yordamlar seldan talafot ko‘rgan aholiga yetkazib berilmoqda”, — deydi Farrux Abdurahmonov.
Izoh (0)