Jizzax viloyatining Forish tumanidagi Egizbuloq qishlog‘i aholisi uchun yangi turar joylar va qo‘shimcha ish o‘rinlari yaratiladi. Bu haqda “Daryo”ga viloyat Favqulodda vaziyatlar boshqarmasi axborot xizmati rahbari Farrux Abdurahmonov xabar berdi.
Mahalladagi hokim yordamchisi Muzaffar Qozoqovning aniqlashtirishicha, hududda seldan zarar ko‘rgan xonadonlar 114 ta ekani ma’lum bo‘lgan. Va shu xonadonlarning tiklab bo‘lmas darajaga kelgan 53 tasi o‘rnida shuncha miqdorda yangi uy qurib beriladi.
Viloyat Favqulodda vaziyatlar boshqarmasi axborot xizmati rahbari Farrux Abdurahmonovning aytishicha, sel yuvib ketgan uylar o‘rnidagi soydan uzunligi 4 km bo‘lgan eni 25 metrlik selga qarshi inshoot (kanal) qurilishi rejalashtirilgan.
Mas’ulning qo‘shimcha qilishicha, hududga borgan favqulodda vaziyatlar vaziri general-mayor Abdulla Qo‘ldoshev hamda viloyat hokimi Ergash Soliyevga mutaxassislarning o‘rganish natijalari ma’lum qilinib, takliflar o‘rtaga tashlangan.
“Quvonarlisi, hudud aholisi uchun yangi uy-joy, ish o‘rinlari yaratilar ekan, kommunal, ijtimoiy soha rivojlantiriladi. Bu esa egizbuloqliklar uchun katta yordam bo‘ladi”, — deydi Farrux Abdurahmonov.
Eslatib o‘tamiz, hududdagi sel sabab katta talafot ko‘rgan 53 ta xonadon vakillari hamda uyi ta’mirga muhtoj 25 ta xonadon aholisi xavfsiz joyga ko‘chirilgan.
Mavzuga doir:
- “Qo‘shnimizning darvozasi oldidan bir o‘lik chiqdi — yoshgina qiz ekan”. Forishliklar Egizbuloqdagi sel oqibatlari haqida
- “Bolam qani, tirikmi? Qaynotamga bergan birinchi savolim shu bo‘ldi”. Forishdagi selda bolasi 100 metr masofaga oqib borgan ayol hikoyasi
- “Sakson yilda takrorlangan sel 12 daqiqada qishloq taqdirini hal qildi, bir oilaning uch nafar vakili o‘limiga sababchi bo‘ldi”. Forishda kelgan sel va uning oqibatlari haqida
Izoh (0)